Cartos invertidos en conciliación, "o mellor camiño cara á igualdade"

A conselleira de Promoción do Emprego e Igualdade, Elena Rivo, reivindicou este mércores os case 17 millóns de euros que a Xunta dedica este ano a plans de corresponsabilidade, porque avanzar en conciliación "é o mellor camiño tamén cara á igualdade".

Así o expresou Rivo durante a súa visita a un dos talleres de verán que se desenvolven en Sanxenxo, onde estivo acompañada polo alcalde, Telmo Martín. Trátase dunha acción que recibe máis de 42.000 euros do Goberno galego para a súa posta en marcha.

A conselleira destacou que o Concello de Sanxenxo organiza seis talleres ao longo doutras tantas semanas estivais nos que participan máis de 70 nenas e nenos. O que visitou este mércores, situado no Auditorio Emilia Pardo Bazán, acolle a máis de 30 menores de entre 4 e 12 anos que fan actividades como cociña, xogos ou manualidades.

Elena Rivo constatou que a Xunta busca "favorecer sempre a corresponsabilidade, axudando a conciliar, para o traballo e para o lecer", para que así calquera persoa poida facer "un uso equilibrado dos seus tempos" co apoio das institucións.

A conselleira de Promoción do Emprego e Igualdade, Elena Rivo, xunto co alcalde de Sanxenxo, Telmo Martín, nun taller para nenos de entre 4 e 12 anos | Fonte: XUNTA