Recortarán a varias alturas a muralla que rodea o Arsenal de Ferrol para "abrir" a cidade ao mar
A ministra de Defensa destaca a colaboración da Armada e Defensa para materializar o proxecto.
Por Europa Press / Redacción | SANTIAGO DE COMPOSTELA | 02/04/2024 | Actualizada ás 19:33
A ministra de Defensa, Margarita Robles, comprometeu a colaboración do Goberno e da Armada para poder materializar o proxecto de 'Abrir Ferrol ao mar', unha iniciativa liderada polo concello e que busca derrubar a varias alturas a muralla do Arsenal Militar para poder contemplar a lámina de auga desde a cidade.
Este martes, a ministra ofreceu unha comparecencia de prensa acompañada polo alcalde ferrolán, José Manuel Rey Varela, e o presidente da Deputación da Coruña, Valentín González Formoso, no que explicaron o proxecto, que chegará este xoves á mesa de contratación da Administración local para adxudicar a redacción da obra.
Robles subliñou que a proposta deberá de recoller unha serie de premisas establecidas por Patrimonio que deben ser "respectadas" pero que a apertura da muralla do Arsenal conta coa "colaboración máxima en todo o que corresponda" do seu ministerio. Así, estímase que o proxecto estará elaborado nun prazo de seis meses. Un proxecto, que, ademais de cuestións de patrimonio, tamén deberá ter en conta "por razóns obvias" a "seguridade da Defensa nacional, que está representada no Arsenal".
Acompañada tamén polo almirante do Arsenal Militar de Ferrol, Ignacio Frutos, Robles detallou que o responsable das instalacións da cidade naval "sempre" lle transmitiu "tantísima ilusión por esta obra", polo que Defensa entende que "todo o que sexa bo para a Armada é bo para Ferrol e para España".
MURALLA REBAIXADA A DISTINTAS ALTURAS
Precisamente, Ignacio Frutos detallou que partes do muro do Arsenal "son orixinais do século XVIII" e hai outros bens que "se foron engadindo máis tarde", polo que actuación será "totalmente respectuosa, sobre todo cos bens do século XVIII". "Haberá partes da muralla, como pode ser desde a porta do Parque ata a porta da Enfermaría, onde haberá que manter unha altura mínima entre metro e medio e dous metros, para que en total co enreixado haxa os catro metros e medio que hai agora mesmo", sinalou.
Pola súa banda, o acalde de Ferrol apuntou que o proxecto defintivo incluirá eses "requirimentos que teñen que ver coa seguridade nacional e cos de patrimonio histórico" co o obxectivo final de que "transitando polo que hoxe é a avenida de Irmandiños, se poida ver o mar". Así, habilitarase unha altura de muro de "un metro e medio e noutros lugares moito menos", segundo Rey Varela, que incidiu en que "un dos lugares máis espectaculares será o dique desde a praza de Galicia ou desde as rúas transversais".
"Rehabilitaremos e rebaixaremos a muralla mantendo as condicións de seguridade das instalacións militares, porque queremos seguir sendo unha das bases militares máis importantes do mundo e aspiramos a que tamén o Arsenal poida crecer e modernizarse", subliñou.
En canto aos prazos, Rey Varela detallou que este xoves "irá a mesa de contratación a adxudicación da redacción do proxecto por un importe de 288.750 euros, sendo o custo total do proxecto de cinco millóns de euros". Por último, o alcalde e senador do PP subliñou o compromiso da Xunta, que financiará a redacción dos proxectos e cofinanciará a execución das obras nunha porcentaxe do 50%, cunha achega de máis de 5,7 millóns de euros.
