Adicae aposta pola vía xudicial contra NGB

A pesares de que a Xunta de Galicia insistiu este martes na vía da arbitraxe para solucionar o problema das preferentes e en negar a intencionalidade da entidade, a Asociación de Usuarios de Bancos, Caixas de Aforro e Seguros de Galicia (Adicae) presentou na Fiscalía Superior de Galicia os expedientes de case 500 prexudicados galegos para que sexan incluídos na acción de consumo colectiva anunciada pola Fiscalía.

 

Esta asociación pediulle á Fiscalía que requira a Novagalicia Banco a remisión de todas as circulares e documentos internos que a dirección da antigas Caixa Nova e Caixa Galicia enviou ás sucursais.

 

 

E é que nun escrito presentado este mércores na Fiscalía Superior de Galicia, Adicae fixo entrega de 6 circulares internas elaboradas pola dirección de Caixa Nova desde o ano 2004 até o ano 2009 nas que se lles dá ordes precisas ás sucursais de como, a quen e de que forma deben "colocar" as participacións preferentes. Estas circulares chegan a propoñer directamen que se lles venda este producto financiero "en pequeñas cantidades a un gran número de ahorradores que busquen garantía de capital y de intereses". Tamén destacan que "cuanto más al menudeo mejor” porque coa “tranquilidad de que, en el caso de necesitar disponer, total o parcialmente, de su dinero, la Caja tendrá habilitado un Mercado Secundario interno, que en un plazo máximo de 15 días desde la solicitud del cliente, nos permita hacerla efectiva”.

 

Ademais, acreditan que xa no ano 2006 Caixanova tiña sen executar ordes de venda por importe de máis de 10 millóns de euros, polo que incentivou ás sucursais para dar entrada a novos clientes que busquen garantía de capital e de intereses, recolocando en primeira instancia entre os seus propios clientes ou na súa zona de actuación os títulos postos á venda. "Esto supondrá un impacto positivo automático en la cuenta de resultados de la oficina, beneficiándose en mayor medida aquellas oficinas que tengan mayor volumen colocado de las distintas emisiones", recollen estes escritos internos.

 

 

Segundo estes documentos uno dos obxectivos desta caixa na primeira emisión de participacións preferentes do ano 2004 era “reducir el coste del pasivo, por un lado, en el trasvase de las imposiciones de plazo fijo caro hacia productos de mayor margen para la Caja”. Así, a súa colocación “se convierte en un objetivo estratégico para la Caja”, e por iso, ordenase “colocarlas en pequeñas cantidades a un gran número de ahorradores y conseguir llegar a todos nuestros clientes potenciales con imposiciones de bajo importe, siendo recomendable imposiciones de importe hasta 12.000 euros”. Ests obxectivos continúan ata a última emisión do 2009 “como estrategia para reforzar el Coeficiente de Solvencia de la caja se ha trazado un plan de actuación en el que esta  emisión es el pilar básico”.

 

Por iso, como Asociación de Consumidores, personarase na acción colectiva que interpoña a Fiscalía. Precisamente, e en cumprimento do solicitado en febreiro de 2012 pola Fiscalía Provincial de Pontevedra, remitiulle 472 expedientes de consumidores prexudicados asociados, 237 recollidos na provincia da Coruña e 235 recollidos na provincia de Pontevedra.