Tras a noticia do GC, dirixentes socialistas insinuaron a Defensa que non era moi apropiado a celebración deste acto xusto cando a ministra asistía na Coruña á toma de posesión de Miguel Cortizo como delegado do Goberno.
Por Galicia Confidencial | A Coruña | 08/04/2011
A comisión pola Recuperación da Memoria Histórica da Coruña (CRMH) pediralle á ministra de Defensa, Carmen Chacón, que impedira a conferencia deste xeneral na Coruña polo seu pasado franquista. Finalmente, e tras a mediación de dirixentes socialistas locais, que informaron deste feito ao Ministerio, o departamento de Chacón deu ordes de paralizalo.
Convite oficial
“El General Jefe de la Fuerza Logística Operativa y en su nombre el Coronel Director del Museo Militar de La Coruña, tiene el honor de invitarle a la conferencia El asedio y liberación del Alcázar de Toledo, que impartirá el Excmo. Sr. D. Blas Piñar Gutiérrez, General de Brigada de Infantería, que tendrá lugar el jueves 14 de abril de 2011 a las 20 horas, en el Museo Militar; plaza de Carlos I s/n de La Coruña”.
Con esta carta de convite e co logo do Ministerio de Defensa se presentaba a conferencia que Blas Piñar, fillo do histórico dirixente de Fuerza Nueva, ía impartir na Coruña e que causou a indignación da CRMH por consideralo "ofensivo" contra todas as vítimas do franquismo.
"Manifiesto de los 100"
o capitán Blas Piñar Gutiérrez foi un dos promotores do chamado Manifiesto de los 100, que defendía a militares golpistas como Miláns e Tejero, despois da intentona golpista do 23-F de 1981. Co citado manifesto os golpistas pretendían presionar e atemorizar ao Goberno e aos medios de comunicación na víspera do consello de guerra contra os golpistas. "Los insultos y ataques a nuestros compañeros los consideramos dirigidos a la colectividad, con las consecuencias que ello dé lugar”, apuntaba aquel escrito.
Logo do fracaso do golpe, Blas Piñar continuou no Exército e foi ascendendo ate Xeneral de Brigada, a proposta do ministro de Defensa, Federico Trillo, en xaneiro de 2004.
Cancelación da conferencia
con estes antecedentes, O presidente da Comisión pola Recuperación da Memoria Histórica da Coruña, Manuel Monge, anunciou que entregaría un escrito á ministra de Defensa, Carme Chacón este venres na Delegación do Goberno na Coruña para impedir a súa celebración.
Nese escrito a CRMH solicitaba á ministra que dea as ordes oportunas para que non se celebre a conferencia en instalacións militares, e que se abra unha investigación para delimitar as responsabilidades dos citados militares por invitar a esta conferencia, utilizando o logotipo oficial do ministerio de Defensa.