Como será o despregamentos da fibra óptica nos casco vello de Santiago
A Xunta anuncia, xunto ao Concello de Santiago, a apertura dunha consulta a operadores para despregar fibra na zona vella compostelá.
Por E.P. | SANTIAGO DE COMPOSTELA | 22/07/2019 | Actualizada ás 14:19
O conselleiro de Cultura e Turismo, Román Rodríguez, destacou este luns a responsabilidade das administracións de dotar dos servizos necesarios aos centros históricos das cidades "para que non se convertan só en espazos turísticos onde non vive a xente".
Así o sinalou Rodríguez na inauguración da xornada 'A conectividade dos casos históricos', levada a cabo no Museo das Peregrinacións de Santiago, á cal tamén acudiron, entre outros, o alcalde compostelán, Xosé Sánchez Bugallo, e a directora da Axencia para a Modernización Tecnolóxica de Galicia (Amtega), Mar Pereira.
Na devandita xornada, na que se presentou o primeiro catálogo de solucións para facilitar a extensión de fibra óptica nestas zonas, o conselleiro de Cultura subliñou a responsabilidade por parte da sociedade e das administracións de conservar as zonas vellas, aínda que reivindicou a necesidade de dotalos de servizos para convertelos en "espazos agradables para vivir".
Tamén explicou que a guía presentada este luns define aos operadores técnicos "como facer as cousas" para así "preservar os centros históricos e que haxa vida" neles. Para a elaboración desta guía partiuse do caso concreto de Santiago de Compostela e, en colaboración co Concello, co Consorcio de Santiago e cun equipo multidisciplinar, integrado por arquitectos, enxeñeiros de telecomunicación e técnicos, elaboráronse unha serie de propostas "viables e extrapolables" a outros conxuntos históricos.
SOLUCIÓNS
Entre as solucións que ofrece a guía para o despregamento de fibra óptica, e que foron pactadas e avaliadas por Patrimonio, están o trazado por cornixa, o soterramento ou o despregamento da fibra óptica a través das redes de saneamento.
Román Rodríguez insistiu que como pasou noutros séculos, cando foi necesario dotar ás zonas vellas das urbes de saneamento e electrificación, a fibra óptica na actualidade é necesaria para "facilitarlle a vida á xente". No documento, "dicir ás empresas como deben facer as cousas" e dáselles "certeza e seguridade xurídica", xa que "se cumpren eses parámetros non van ter problemas na execución".
"GRAN RETO"
Para o alcalde de Santiago, o "gran reto" dos centros históricos é "manter a poboación e a actividade económica", polo que tanto as persoas que viven como os negocios "necesitan conectividade". Neste sentido, lembrou que o Consorcio de Santiago realizou un plan de infraestruturas onde incluía as actuacións necesarias para a zona vella da cidade que calculaba en 110 millóns de euros o investimento necesario, "un custo absolutamente fose do alcance da capacidade investidora das administracións públicas".
Por iso, segundo Bugallo, hai que buscar fórmulas que permitan investimentos que sexan "economicamente viables" ademais de "tecnicamente factibles" e así incorporar as últimas tecnoloxías. "Unha cidade histórica non pode ser viva e habitada se non é capaz de ofrecer aos residentes unha calidade de vida similar ao resto do municipio", sentenciou.
