Seguen baixando as exportacións galegas e subindo as importacións

As exportacións galegas rexistraron en maio un descenso do 6% en relación co mesmo mes do ano anterior, mentres que as importacións aumentaron un 5,7% en taxa interanual, segundo os datos que publica este martes o Instituto Galego de Estatística (IGE).

Pola súa banda, as exportacións de vehículos automóbiles e tractores son as que tiveron unha maior repercusión negativa na variación interanual. As importacións creceron debido fundamentalmente ao aumento nas importacións de combustibles e aceites minerais.

Pola contra, os produtos con maior influencia positiva nas exportacións foron as pezas de vestir non de punto, que, cun peso do 19,5% sobre o total e unha taxa de variación do 40,4% con respecto a maio de 2018, repercuten en 5,3 puntos na taxa de variación.

En importacións, as maiores repercusións negativas foron materias plásticas e as súas manufacturas, que, cun peso do 1,8% sobre o total, repercuten en -1,7 puntos.

En maio, as expedicións dirixidas á UE-28 (79,5% do total) presentan unha taxa de variación interanual do -3,3%. Prodúcense os maiores descensos en Bélxica (-56,4%), Francia (-13,0%) e Reino Unido (-16,6%), países que concentran o 27% das exportacións totais; mentres que os Países Baixos (21,7%) e Alemaña (18,7%) ascenden.

No caso das introducións da UE-28, que neste mes de maio representan un 52,5% do total, prodúcese unha diminución do 3,6% debido fundamentalmente á diminución das compras a Portugal (-25,5%). Entre os países cos que as compras aumentan atópanse Eslovaquia (78,7%) e Italia (28,7%).

Destaca por outra banda o aumento das dirixidas a China fronte á diminución das que teñen como destino os Estados Unidos. Mentres, no que ten que ver con importacións, aumentan as procedentes de China e diminúen as de Oriente Medio.

O peso de Galicia no conxunto de España, en maio de 2019, ascende ao 7,3% no total de exportacións e ao 6% nas importacións.

Contenedores de Exportación. EUROPA PRESS - Archivo