Por Europa Press / Redacción | SANTIAGO DE COMPOSTELA | 24/07/2019 | Actualizada ás 21:40
Transportes Pacholo e o comité de empresa asinaron un acordo que pon fin á folga de 101 días mantida no servizo de transporte de servizos sólidos a Sogama desde mediados do mes de abril.
Segundo informa a compañía, subcontrata maioritaria do transporte por estrada á planta de Sogama de Cerceda (A Coruña), o acordo alcanzado ten unha vixencia de cinco anos e substitúe ao convenio actual, que terminaba en decembro de 2020.
Os sindicatos lograron que a compañía acepte a readmisión dos oito condutores despedidos, que serán recolocados antes do próximo 31 de decembro sen que se produza "un incremento do persoal que o servizo non requira", indica a empresa.
Ademais, o novo convenio, que terá validez ata finais de 2024, establece aumentos salariais progresivos entre o primeiro ano e o último.
Así mesmo, en virtude do pacto, os traballadores acordan renunciar aos procesos xudiciais abertos. Deste xeito, empresa e sindicatos comprométense a abrir un período de "paz social" que poña fin ás tensións vividas desde o ano 2016.
Así as cousas, o acordo alcanzado este mércores pon fin a unha folga que durou 101 días, desde o 15 de abril deste ano.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.