Xunta, empresarios e colectivos sociais reúnense en busca de "consenso" para a elaboración da Lei do Xogo
A Comisión de Xogo Responsable apela a "protexer aos máis vulnerables" coa actualización da normativa sobre o xogo.
Por Europa Press / Redacción | SANTIAGO DE COMPOSTELA | 26/07/2019 | Actualizada ás 15:00
A Xunta reuniu este venres a empresarios do xogo e colectivos sociais para traballar na procura de "consenso" co obxectivo de "protexer" aos grupos "máis vulnerables" a través da elaboración da nova lei de xogo galega.
Así o explicou este venres o director xeral de Emerxencias e Interior, Santiago Villanueva, que se citou coas diferentes "partes implicadas" na Comisión do Xogo Responsable para debater sobre a actualización da lei de xogo, que renovará un texto de 1985 e prevese aprobar nos próximos meses. Neste sentido, Villanueva apuntou que o grupo de traballo está a dirimir un anteproxecto de lei para regular o "xogo presencial", que é competencia do Goberno autonómico e que inclúe ás casas de apostas e ás máquinas que se atopan nos locais de hostalaría.
O responsable de Interior sinalou que nesta reunión presentarase ante a comisión un texto que atenda ás "alegacións" feitas por numerosos colectivos, asociacións e grupos despois de que se expuxese o primeiro borrador da nova lei.
Desta forma, as partes implicadas "estimarán ou desestimarán" ditas réplicas e incluiranas ou non no novo escrito que trata de actualizar o control destas prácticas para que "só xoguen" persoas maiores de idade que non se atopan en "situación de vulnerabilidade" e que non o fagan aquelas que "non poden ou non deben facelo".
Ademais, a Xunta ten competencia para establecer medidas en casinos, bingos, salóns de xogo e tendas de apostas. Precisamente, o Goberno autonómico traballa na procura de accións nestes locais para vixiar unha actividade "que xa está moi controlada", insistiu Santiago Villanueva.
PREVENCIÓN
Así mesmo, explicou que todos os establecementos de xogo contan con "controis de acceso obrigatorio" nos que é necesario "identificarse" para evitar a entrada de menores e de todas aquelas "persoas que o teñan prohibido" por resolución xudicial ou que estean dadas de alta nun rexistro de censurados por vontade propia.
En todo caso, esta lei tamén establecerá "límites" á publicidade e disposicións de carácter preventivo para combater a ludopatía e así aumentar a regulación do xogo e impedir a actividade a aquelas persoas que non poden nin deben xogar.
Con todo, o director xeral non especificou medidas concretas para restrinxir o acceso ás apostas aos menores de idade, nin nos propios establecementos nin nas máquinas de xogo que se atopan en locais de hostalaría.
