En Marea reúnese con Greenpeace para propor accións contra o cambio climático onde "Galicia ten todo por facer"
Luís Villares reiterou a súa intención de levar ao Parlamento galego a "declaración de emerxencia climática" e "promover iniciativas políticas" que aposten polas enerxías renovables.
Por Europa Press / Redacción | SANTIAGO DE COMPOSTELA | 27/07/2019 | Actualizada ás 19:02
O portavoz de En Marea, Luís Villares, e outros integrantes da dirección reuníronse coa tripulación do barco da organización Greenpeace, o Rainbow Warrior III, para comentar diversas propostas "alternativas e urxentes" contra a crise climática na que "Galicia ten todo por facer".
Así o informou a agrupación liderada por Villares este sábado nun comunicado, no que En Marea explicou que o obxectivo desta reunión en Vilagarcía de Arousa foi achegar á cidadanía a campaña 'En marcha polo clima', que pretende "denunciar as graves consecuencias" do cambio climático e conseguir a "participación activa" na transición enerxética.
Neste sentido, Luís Villares reiterou a súa intención de levar ao Parlamento galego a "declaración de emerxencia climática" e "promover iniciativas políticas" que aposten polas enerxías renovables. Ademais, a formación acusou ao presidente da Xunta, Alberto Núñez Feijóo, de "non desenvolver ata agora mapas de transición enerxética" por considerar que "non existe unha preocupación real por modificar as fontes de enerxía, o transporte público" ou por cambiar a forma na que se "abastece a industria".
De feito, o portavoz de En Marea asegurou que se debe "acabar coas fontes de enerxía baseadas nos combustibles fósiles", que son "os principais responsables" do cambio climático "a nivel de todo o planeta".
