Palangreiros de Ribeira e Marín trasladan á Xunta a súa preocupación ante as dificultades na fronteira mauritana

A conselleira do Mar, Rosa Quintana, reuniuse esta semana con representantes da asociación Orpal, que agrupa a buques palangreiros da localidade coruñesa de Ribeira e de Marín , para escoitar as inquietudes desta entidade en relación ás dificultades coas que se atopan no espazo entre as fronteiras de Mauritania e Marrocos os camións que transportan o peixe que captura esta frota.

Neste sentido, o presidente de Orpal, José Antonio González, trasladou á titular de Mar da Xunta a preocupación desta entidade, "compartida co Goberno galego", xa que os bloqueos que se rexistran na zona da devandita fronteira "impiden o normal desenvolvemento do transporte de produtos frescos a España".

Así, nun comunicado, o Executivo autonómico asegurou que Quintana expuxo aos representantes de Orpal os contactos realizados co Goberno central solicitando xestións para dar solución a esta situación. Neste sentido, a conselleira explicou que lle trasladou "fai máis de cinco meses" a preocupación en relación a esta cuestión a través dunha misiva á secretaria xeral de Pesca.

Nesta carta, a Xunta solicitou ao Ministerio de Pesca a mediación entre Marrocos e Mauritania e a demanda á Comisión Europea do establecemento de medidas transitorias e excepcionais como a validación da realización de descargas de peixe no porto de Dakhla por parte dos buques afectados.

Activistas de Greenpeace e o palangreiro 'Ameal'. | Fonte: Greenpeace Kajsa Sjölander