A Garda Civil suma 57 efectivos e un helicóptero ao operativo estival contra os incendios forestais

A Garda Civil incorporou 57 novos efectivos e un helicóptero ao dispositivo de prevención de incendios forestais que se desenvolve este verán en Galicia desde o pasado 1 de xullo ao próximo 30 de setembro.

Así o confirmou o delegado do Goberno en Galicia, Javier Losada, este mércores nun acto celebrado en Forcarei  no que estivo acompañado da alcaldesa da localidade, Verónica Pichel, e dos responsables das Comandancias da Garda Civil en Pontevedra, Simón Venzal, e A Coruña, Francisco Javier Jambrina.

Deste xeito, a Benemérita suma novos axentes para reforzar o operativo de prevención de incendios. Deles, 14 persoas reforzarán o escuadrón de cabalaría, 18 a ARS, outro tres axentes a unidade área, dez a policía xudicial e 12 o Seprona. O operativo especial de prevención de incendios é un do tres dispositivos que desprega este verán a Benemérita na Comunidade galega, xunto co dos plans dos camiños de Santiago e o de turismo seguro.

Segundo destacou o delegado do Goberno, no que vai de ano 36 persoas foron detidas e investigadas como presuntos responsables de incendios forestais. A maior parte foron en Ourense (18), seguida por Lugo (11) e Pontevedra (7).

"Na loita contra os incendios, a Garda Civil implica a persoal de todas as áreas. En total, traballan en Galicia este verán 3.024 persoas para protexer a Comunidade do lume. Implica a Seguridade Cidadá, o Servizo de Información, o Seprona, a Policía Xudicial, a Unidade Aérea e Tráfico", destacou Javier Losada.

O delegado do Goberno, Javier Losada, nun acto coa cabalaría da Garda Civil. DELEGACIÓN DO GOBERNO | Fonte: Europa Press