Por Europa Press / Redacción | SANTIAGO DE COMPOSTELA | 02/08/2019 | Actualizada ás 16:32
A Garda Civil e a Policía Xudiciaria portuguesa realizaron a pasada semana varios rexistros en distintas empresas da provincia de Pontevedra e investigaron penalmente por un delito fiscal a dez persoas vinculadas cunha operación aberta en Portugal para indagar sobre un posible caso de fraude relacionada cos fondos da Comunidade Económica Europea.
Segundo informou o Instituto Armado, por mor dunha orde europea de investigación instada polas autoridades xudiciais portuguesas, por conduto do Xulgado de Instrución número 4 de Vigo, a Unidade Orgánica de Policía Xudicial da Garda Civil de Pontevedra, activou un protocolo de cooperación internacional coa Policía Xudiciaria do país veciño, no marco da denominada 'Operación Frangus', que concluíu con catro rexistros e a notificación de dez persoas por un delito fiscal.
A orde europea de investigación xurdiu por mor das investigacións que se están levando a cabo en Portugal sobre supostas fraudes en subvencións concedidas pola Comunidade Económica Europea.
As mesmas fontes explicaron que no marco destas investigacións se puido pescudar que existían empresas en ambos os países que tiñan establecido entre elas un circuíto de facturacións para obter fondos comunitarios do programa 'Portugal 2020'.
Para iso, as empresas en Galicia, algunhas das cales estaban administradas por cidadáns portugueses, "poderían estar a emitir facturacións falsas para as sociedades portuguesas, chegándose a verificar que algunhas das sociedades que conformaban a armazón figuraban dirixidas polo mesmo administrador", indicou a Benemérita.
En total investigáronse dez persoas por delito fiscal e realizáronse catro rexistros na provincia de Pontevedra, que levaron a cabo de forma simultánea a pasada semana en distintas sociedades situadas nos municipios pontevedreses de Vigo, O Rosal e Oia.
DOCUMENTACIÓN INTERVIDA
Nos rexistros procedeuse á incautación de numerosa documentación relativa a balances, extractos de contas correntes, declaracións fiscais, comprobantes de pago, entre outros, que, consideran as mesmas fontes, "poden ser determinantes para esclarecer os feitos investigados", nos que o montante da cantidade defraudada pode superar os 20 millóns de euros.
A falta dunha análise pormenorizada da documentación intervida nos rexistros, despréndese que a facturación destas sociedades, subliñan as mesmas fontes, "non responde a negocios subxacentes reais, senón máis ben que estaban orientadas exclusivamente a xustificar de forma fraudulenta as solicitudes de subvencións de fondos europeos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.