Por E.P. | SANTIAGO DE COMPOSTELA | 03/08/2019 | Actualizada ás 17:15
O alcalde de Ourense, Gonzalo Pérez Jácome, ditou unha orde pola que insta os traballadores municipais a "non levar" os vehículos oficiais as fins de semana. Pídelles que, no canto diso, os "depositen" nunha instalación do concello, agás aqueles empregados que conten cunha "autorización expresa" previamente comunicada á administración local.
A medida foi ditada polo primeiro edil ourensán nunha providencia de custodia de vehículos municipais na que os funcionarios só poderán utilizar os coches durante as fins de semana en caso de ter unha autorización do concelleiro delegado ou do xefe de servizo correspondente, segundo informou o concello da cidade termal este sábado nun comunicado.
Por tanto, os traballadores terán que asumir esta nova orde, xunto coa de control horario, que foi a primeira disposición do alcalde no seu mandato. Respecto diso, nunha entrevista concedida a Europa Press o pasado xullo, Jácome argumentou que os empregados debían "cumprir o horario", á vez que sostiña que "sobraba persoal sen cualificar" porque "o 90 por cento" dos funcionarios entraran "por enchufe".
No seu momento, o persoal do Concello mostrouse molesto, non pola disposición en si, que aseguraron "comprender", senón por ser a primeira actuación do novo alcalde cando consideraban que había "outras cuestións moito máis importantes".
O rexedor de Ourense, na súa primeira semana de mandato, tachara de "mafia do escaqueo" aos traballadores municipais, aínda que logo matizou que existía "xente con talento e vontade entre as mazás podrecidas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.