Galicia perde o carro da producción industrial
Cae un 6,3% en xuño en Galicia, tres veces e media máis que no conxunto estatal. No que vai de ano, o indicador acumula unha diminución do 7% na comunidade.
Por Europa Press / Redacción | Santiago de Compostela | 08/08/2019 | Actualizada ás 11:08
O índice xeral de produción industrial caeu un 6,3% en xuño en Galicia en relación ao mesmo mes do ano anterior, tres veces e media máis que o descenso rexistrado para o conxunto estatal (-1,8%), segundo os datos que publica este xoves o Instituto Nacional de Estatística (INE).
Deste xeito, no que vai de ano, este indicador sobre a produción da industria na comunidade galega acumula unha diminución, en concreto, do 7%. No conxunto estatal, a produción industrial baixou un 1,8% o pasado mes de xuño en evolución anual, taxa 3,6 puntos inferior á de maio.
Co retroceso interanual de xuño, a produción industrial regresa a taxas negativas tras repuntar un 1,8% en maio despois de dous meses consecutivos encadeando descensos. Todos os sectores industriais, salvo a enerxía (+4,8%), recortaron a produción en xuño: os bens intermedios (-5,5%), os bens de consumo duradeiro (-4,8%), os bens de consumo non duradeiro (-3,1%) e os bens de equipo (-0,5%).
Corrixida de efectos estacionales e de calendario, a produción industrial subiu un 1,8% respecto de xuño de 2018, taxa 0,4 puntos superior á rexistrada en maio. Os índices corrixidos de efectos estacionales e de calendario só presentaron taxas anuais negativas nos bens intermedios (-1,9%). O resto de sectores presentaron ascensos na enerxía (+5,8%), os bens de equipo (+3,7%), bens de consumo non duradeiro (+3%) e bens de consumo duradeiro (+0,3%).
Por sectores, bens de consumo duradeiro (+1,6%), bens de equipo (+1,1%) e enerxía (+0,9%) presentaron taxas mensuais positivas, mentres que bens de consumo non duradeiro (-1%) e bens intermedios (-0,2%) rexistraron taxas negativas.
SOBE EN SEIS COMUNIDADES
A produción industrial aumentou o pasado mes de xuño en seis comunidades autónomas en taxa interanual e diminuíu nas outras once. Os maiores incrementos producíronse en Madrid (+6,1%), Navarra (+4,1%) e Murcia (+3,5%), mentres que os maiores descensos déronse en Canarias (-9,5%), Baleares (-7,8%) e Galicia (-6,3%).
