Piden que o goberno de Ferrol paralice o cobro dos recibos atrasados de saneamento

Integrantes da Plataforma en defensa dos servizos públicos instaron ao novo goberno de Ferrol a que "non continue cobrando os recibos de saneamento correspondentes entre o 1 de xaneiro de 2015 ao 31 de marzo de 2017", ao estimar que durante ese período de tempo "non se estaba realizando a depuración das augas residuais".

Así o asegurou Lupe Ces, unha das integrantes desta plataforma, tras finalizar un encontro que mantiveron este xoves coa concelleira de Servizos, Ana Lamas (PSOE), e co edil de Seguridade e Tráfico, Germán Costoya. Na reunión, pediron a paralización da remisión de recibos atrasados, xa que "o seguinte será enviado a principios do ano que vén".

Ces tamén pediu "urxencia" ao novo goberno con respecto a este asunto e así incidiu en que estima que este é "un cobro inxusto, porque o servizo non se daba, sendo ademais discriminatorio cos veciños de Narón, que non teñen que pagar estes 31 meses que si se lles reclaman aos de Ferrol".

A integrante da plataforma cidadá detallou que o paso ao cobro destes recibos atrasados "suporá o ter que facer fronte a unhas cantidades importantes", ao estimar en "case 300 euros o gasto medio que deberán de afrontar as familias por un servizo que non foi prestado".

Por iso, reclamou "a súa paralización" e trasladei "unha serie de medidas a tomar", ao mesmo tempo que sinalou que "a actitude da concelleira foi de escoita". "Logo veremos se efectivamente se confirma que hai máis reunións con esta plataforma e se a partir delas dáse algunha decisión política", concluíu.

Ángel Mato, alcalde de Ferrol, no seu despacho no concello.