Denuncian contratacións de persoal "sen publicidade" en centros de maiores da Coruña dependentes da Xunta

A CIG denunciou a contratación "sen publicidade" de persoal para cubrir vacantes en residencias de maiores da Coruña dependentes da Xunta, unha denuncia que trasladou á Consellería de Facenda solicitando "a depuración de responsabilidades pola formalización de contratos sen atender os principios de igualdade, mérito e capacidade".

Nun comunicado, asegura que "pola falta de previsión e nula eficiencia administrativa da Función Pública, as listas elaboradas para substituír persoal da categoría de enfermaría (ATS e auxiliar de enfermaría) están esgotadas desde o mes de xuño".

"Polo que, para cubrir as ausencias de vacacións de verán ou baixas por enfermidade, a Xunta de Galicia debería facer un chamamento ás oficinas de emprego, como mínimo de tres persoas por praza, para proceder seleccionar ao persoal segundo os méritos e capacidade certificados e baremados obxectivamente no convenio de persoal laboral".

SEN PARTICIPACIÓN SINDICAL

Con todo, asegura que, desde os centros de maiores dependentes da Xefatura Territorial da Coruña, "están a efectuarse contratos para cubrir ausencias, sen publicidade e sen sistema ningún de baremación ou selección". En concreto, indica que a elección se fai por parte da dirección "sen participación sindical nin órganos de selección tal e como establece o convenio".

Por iso, afirma que solicitou que se verifique se as persoas contratadas están a cumprir cos requisitos de titulación, así como non estar incursos en incompatibilidades, ademais de instar á Consellería de Facenda a "depurar responsabilidades ás que houbese lugar por parte dos empregados públicos". "Que, a propósito da súa inxustiza, contrataron a persoal laboral" cunhas contratacións que o sindicato ve "arbitrarias", sinalou.

Persoas maiores | Fonte: EP