Por Europa Press / Redacción | SANTIAGO DE COMPOSTELA | 22/08/2019 | Actualizada ás 17:15
O grupo municipal de Marea Atlántica denunciou "atrasos" e "falta de pagamentos" da renda social municipal durante o verán, unha situación que vincula co "bloqueo" dos orzamentos de 2019.
Nun comunicado, afirma que o citado "bloqueo" ás contas presentadas por Marea Atlántica durante o seu goberno está a facer que os fondos destinados a esta renda non sexan "suficientes". "Advertímolo antes da investidura", sinala Marea Atlántica, que se pon a disposición do equipo de goberno socialista "para resolvelo".
En concreto, explica que están a producir "atrasos" no abono da mensualidade da renda social municipal correspondente ao mes de agosto e que se acumulan "ata dous meses de falta de pagamento" no caso das novas prestacións concedidas.
Desta situación, culpa ao PP e ao PSOE da Coruña "que votaron en contra dos orzamentos de 2019 en febreiro e impediron, entre outras cousas, incrementar os fondos necesarios para atender todas as solicitudes da renda social municipal", engade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.