Un total de 160 prazas para asistir a cursos gratuítos de condución segura de motos
O programa conta cunha parte teórica e outra práctica e realizarase en varias localidades galegas ao longo de setembro.
Por E.P. | SANTIAGO DE COMPOSTELA | 28/08/2019 | Actualizada ás 13:10
Ata 160 persoas poderán asistir a cursos gratuítos de condución segura de motocicletas en varias localidades galegas durante unhas xornadas formativas os dous últimos fins de semana de setembro, que abren o seu prazo de inscrición o próximo día 2 do próximo mes.
En concreto, estes cursos terán lugar o vindeiro sábado 21 de setembro en Ferrol, o domingo 22 en Santiago, o seguinte sábado 28 en Vilagarcía de Arousa (Pontevedra) e o domingo 29 en Vigo. Unhas xornadas que contarán cunha quenda de mañá e outro de tarde, segundo precisou a Administración autonómica este mércores nun comunicado.
O obxectivo desta iniciativa é que os condutores cos carnés B+3, A1, A2 e A poidan "mellorar o control das súas motos dunha forma segura e eficiente", explicou a Xunta. Ademais, para "optimizar" os cursos, cada grupo estará integrado por un máximo de 20 alumnos.
Así, o programa conta cunha parte teórica e outra práctica. A primeira abordará asuntos do equipamento para a protección individual, o estado de mantemento do vehículo, as situacións de risco como a climatoloxía adversa, a freada, os xiros ou os adiantamentos.
Por outra banda, o Goberno galego tamén apuntou que a sección práctica consistirá na realización de manobras en parado, accións de axilidade, equilibrio, freada, traxectoria e un itinerario final que inclúe todos os movementos anteriores.
Desta maneira, cumprirase cunha iniciativa de sensibilización que comezou en 2017 e que conta coa colaboración de Unión de Moteiros Europeos, Pons Seguridade Viaria e a Escola Nacional de Condución de Motocicletas. Igualmente, esta acción inclúese dentro do Plan de Seguridade Viaria 2016-2020 e trata de reducir a sinistralidade na estrada.
