Por Xurxo Salgado | Compostela | 28/04/2012 | Actualizada ás 13:10
La Voz de Galicia acaba de facer unha oferta para que saían do xornal tres dos seus históricos na Coruña; Félix Soria, Manuel Guisande e Pablo Manzano segundo informaron a GC diversas fontes desta empresa. A empresa deulles dez días de vacacións para que mediten sobre esta posibilidade. E é que, tal e como aprobou o pasado ano, o grupo que preside Santiago Rey ten que desfacerse de 75 dos seus traballadores.
A oferta realizada é unha indemnización por baixa voluntaria de 35 días por ano traballado, cun tope de 24 meses, o que significa entre 90.000 e 110.000 euros. Se estes profesionais non aceptan o acordo entón irán a xuízo e a empresa, utilizando a nova reforma laboral aprobada polo PP, alegará razóns obxectivas para os despidos e pedirá só 20 días por ano traballado.
Fernando Salgado
Ademais, La Voz de Galicia tamén lle ofreceu unha saída ao xornalista Fernando Salgado, aínda que, a diferencia do resto dos seus compañeiros, no seu caso seguiría como colaborador do xornal, aínda que non como traballador e nas condicións actuais.
Estas baixas supoñen o fin de dous suplementos importantes do xornal: Mercados e Monográficos que desaparecen e pasan a integrarse na sección de Economía, que dirixe Sofía Vázquez. Precisamente, Fernando Salgado era o responsable do suplemento Mercados e Félix Soria e Manuel Guisande, encargabanse dos monográficos. Pola súa banda, Pablo Manzano era do departamento de Deseño e Infografía.
Máis baixas en Vigo e Santiago
Estas baixas súmanse a outras que xa tiveron lugar na Delegación de Santiago, onde La Voz tamén despediu a outros históricos do xornal como Luis Cristovo ou Luis Villamor ou a cinco despidos na Delegación de Vigo. Unhs medidas que se enmarcan dentro do ERE que a empresa puxo en macha o pasado ano para despedir a 75 persoas. Tras abrir un prazo de baixas incentivadas, ás que se sumaron 15 persoas cercanas á edade de xubilación e outras cinco que pediron a excedencia voluntaria, o grupo Voz comenzou a inicios deste ano un proceso de despedimento de traballadores para cumprir eses obxectivos.
A estas medidas tamén se lle suman outras de aforro que se puxeron en marcha o pasado ano coa reducción de varias corresponsalías e cambios nos mandos intermedios do organigrama do grupo. Así, Laureano López, pasou de ser delegado na Coruña, a xefe de sección de Galicia e se fusionaron as delegacións de Pontevedra e Vilagarcía, ao frente das que se situou a Manuel Blanco.
Traxectoria
Durante a súa carreira profesional, Fernando Salgado foi xefe da sección de Economía de "La Voz de Galicia", cargo que abandonou para ser o conselleiro de Economía no Goberno tripartito (1987-89). Posteriormente foi deputado autonómico desde 1989 até 1994 e, por un breve período de tres meses, portavoz do Grupo Socialista.
En setembro de 1994 abandonou a Cámara galega para dirixir o diario "O Progreso de Lugo". En 2000, deixou o grupo lucense de comunicación e ingresou de novo en La Voz, para ser o delegado provincial en Lugo. Autor de diversas publicacións, destacan os seus estudos biográficos sobre a figura do escritor e xornalista Lorenzo Varela.
Félix Soria é xornalista desde hai 37 anos e 26 deles en La Voz de Galicia. É o responsable do blog Im-pulso. Manuel Guisande, de 53 anos e 26 en La Voz de Galicia, é escritor e guionista. Ademais, conta con premios como Codorniz de Plata da Academia do Humor ou o Isaac Díaz Pardo da Asociación Galega de Editores. Pablo Manzano é deseñador e infografista.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.