A reasignación de fondos europeos para o dragado da ría do Burgo fai que a Xunta pida un informe ao Goberno

A Consellería de Infraestruturas e Mobilidade solicitou ao Ministerio para a Transición Ecolóxica que remita información oficial sobre a petición efectuada a principios deste ano pola Xunta para a reasignación de fondos europeos destinados ao dragado da ría do Burgo, na Coruña.

A través dunha carta dirixida ao secretario de Estado de Medio Ambiente, Hugo Morán, a conselleira do ramo, Ethel Vázquez, demanda ao Goberno central que informe os "avances" do proxecto de rexeneración da ría do Burgo.

Segundo destaca o Executivo autonómico nun comunicado emitido este martes, Vázquez sinala na súa misiva a "necesidade" de completar a rexeneración da ría a través dun dragado ambiental, actuación que, segundo lembra, é de competencia estatal.

Neste sentido, apunta que a comezos do presente ano 2019 a Xunta propuxo que se reasignasen fondos "inexecutables" de depuración na Comunidade galega a dito proxecto, unha petición que "a día de hoxe" non foi contestada "de maneira oficial" por parte o ministerio.

Así, Infraestruturas asegura que "só" teñen constancia do documento sometido a consulta previa a través da páxina web do Ministerio para a Transición Ecolóxica. Nel, continúa a Xunta, figuran "modificacións que permitirían como financiables medidas que posibilitarían acometer o dragado, pero non aparecen a desagregación dos proxectos a financiar".

Por último, a titular do ramo destaca que o saneamento das rías é "prioritario" para o Goberno autonómico, que investiu 100 millóns de euros na "eliminación" das verteduras de augas residuais na ría do Burgo.

Ría do Burgo