Por Europa Press / Redacción | SANTIAGO DE COMPOSTELA | 10/09/2019 | Actualizada ás 15:29
O Partido Popular rexeitou este martes unha batería de medidas propostas polo BNG para evitar os "abusos" por parte das entidades financeiras aos consumidores e avaliar o cumprimento en Galicia do código de boas prácticas bancarias.
A encargada de defender a iniciativa foi a parlamentaria nacionalista Noa Presas, quen criticou que nos últimos anos o presidente da Xunta, Alberto Núñez Feijóo, se limitase a "asentir a toda a política financeira posta en marcha desde o Estado e as institucións europeas", "aliñándose cunha reestruturación bancaria desfasada".
Neste sentido, Noa Presas, que lembrou conflitos como os das preferentes ou o das cláusulas solo, considerou que o "fracaso do marco legal de protección" dos consumidores e a "inacción da Xunta" profundou nunha situación cuxas consecuencias tamén se deixan ver no "peche de oficinas e a perda de emprego no sector". Todo iso, indicou, "favorecendo a exclusión financeira" de moitas localidades de Galicia.
Así, a iniciativa pedía pór en marcha a través do Instituto Galego de Consumo e da Competencia un programa específico de formación en materia financeira e de prevención dos abusos bancarios; avaliar o impacto en Galicia da aplicación do Código de boas prácticas bancarias.
Ademais, avogaba por estudar medidas para reducir a "potencial exclusión financeira dos galegos polo peche das oficinas bancarias sen que iso supoña o aumento do traspaso dos recursos económicos da administración pública ás entidades financeiras privadas".
Estas tres medidas, rexeitas polo PPdeG, contaron co apoio de toda a oposición. Con todo, o Partido Socialista —que solicitou a votación por puntos— se abstivo nos apartados que pedían impulsar unha banca pública galega, así como negociar coas entidades financeiras a aplicación efectiva das contas de pago básicas, este último engadido ao texto orixinal da iniciativa a través dunha emenda defendida polo deputado do Grupo Mixto Francisco Casal.
REXEITAMENTO DO PPDEG
En fronte, a deputada do PPdeG Cristina Romero censurou que o BNG rexeite que se invista diñeiro público en "garantir un servizo que facilita a vida das persoas" pero si apoie destinar fondos a "estudos e avaliacións de normativas recentemente implantadas".
"A regulación, control e supervisión das entidades financeiras é unha competencia estatal e europea", lembrou a parlamentaria do PP, que subliñou que a Xunta, en colaboración coa Federación Galega de Municipios e Provincias (Fegamp) "garantirá" que as localidades galegas conten con "un caixeiro automático" para que os veciños poidan realizar as súas xestións.
Ademais, subliñou que o seu grupo estará ao "carón" de todos os afectados por abusos bancarios.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.