Por Europa Press / Redacción | SANTIAGO DE COMPOSTELA | 11/09/2019 | Actualizada ás 13:22
O comité de folga de traballadores do Aeroporto de Santiago denunciou este mércores os "abusivos" servizos mínimos decretados por Aena, do 100%, en cada unha das tres xornadas de paro convocadas para os días 13, 20 e 27 de setembro.
Segundo informou a CIG a través dun comunicado, os traballadores entenden que, con esta decisión, "a empresa pública vulnera o seu dereito" a folga e avanzaron que recorrerán para que o decreto "sexa anulado".
O comité asegurou que "é a actitude de Aena a que provocou esta convocatoria de folga, por ignorar as súas demandas e por nin sequera recibilos para tratar de achegar posturas". Unha actitude "similar" á que "mantivo a empresa pública á hora de decretar estes servizos mínimos", xa que "non fixo intento algún por sentar a negocialos".
Pablo de Prado, portavoz do comité de folga, lembrou que a orixe desta convocatoria está na "decisión unilateral de Aena" de "non sacar a concurso a cantina" do aeroporto, "suprimindo así un servizo que para o persoal, que traballa na súa maioría en condicións precarias, é imprescindible".
"Sen o servizo de cantina, os traballadores do aeroporto terán que gastar o dobre do que pagaban por un café, un bocadillo ou unha comida", destacou.
Do mesmo xeito, os traballadores denuncian a "cada vez maior precariedade e temporalidade que se está instalando no sector aéreo, o constante aumento da carga de traballo sen o correspondente aumento do cadro de persoal nas empresas afectadas, o incumprimento de cobertura das necesidades de persoal en horario nocturno" ou "a supresión encuberta do servizo de enfermaría do aeroporto", entre outras cuestións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.