O BNG reitera o seu compromiso co "lexítimo dereito á autodeterminación"
Unha delegación do Bloque Nacionalista Galego encabezada pola súa portavoz en Europa, Ana Miranda, participa este mércores en Barcelona nos actos da Diada convidada por Esquerra Republicana de Catalunya.
Por Europa Press / Redacción | SANTIAGO DE COMPOSTELA | 11/09/2019 | Actualizada ás 14:45
Nun comunicado, a formación frontista expresa o seu compromiso con "o lexítimo dereito á autodeterminación dos pobos", o seu apoio ao movemento soberanista catalán e a solidariedade cos "presos e presas políticas".
De feito, o pasado luns, Ana Miranda acudiu ao cárcere de Lledoners (Barcelona) para visitar ao exvicepresidente da Generalitat Oriol Junqueras, ao exconseller Raül Romeva e ao presidente de Òmnium Cultural, Jordi Cuixart, que se atopan en prisión preventiva pola causa independentista.
Este mércores 11 de setembro, a delegación do BNG desprazada a Cataluña --integrada tamén polo secretario de Organización, Bieito Lobeira, e o responsable de Relacións co Estado e director da Fundación Galiza Sempre, Rubén Cela-- participou na ofrenda floral diante do monumento a Rafael Casanova e, a continuación, nun panel sobre política internacional.
Así mesmo, a axenda do Bloque tamén incluíu un encontro celebrado o pasado martes no que os socios da coalición Agora Repúblicas, formada por BNG, Bildu e ERC para as eleccións europeas do pasado mes de maio. A cita tivo como obxectivo avaliar os resultados dos devanditos comicios e definir a estratexia na recentemente iniciada lexislatura en Bruxelas.
