Comezan as obras de ampliación do Museo do Pobo Galego
. A intervención prolongarase ata finais de 2020 e prevese que se inaugure de face ao próximo Ano Santo 2021, unha vez completada a musealización do espazo.
Por E.P. | SANTIAGO DE COMPOSTELA | 18/09/2019 | Actualizada ás 18:42
O alcalde de Santiago, Xosé Sánchez Bugallo, informou de que está previsto que as obras de ampliación e renovación do Museo do Pobo Galego arrinquen este mes de setembro, unha vez peche a actual exposición e queden dispoñibles as salas.
Así llo trasladou ao presidente do Padroado do Museo do Pobo Galego, Xusto Beramendi, nun encontro celebrado este mércores e no que o rexedor explicou que está pendente un encontro co conselleiro de Cultura, Román Rodríguez, para completar a actuación co proxecto museográfico.
En concreto, a obra de adecuación da á sur do conxunto de San Domingos de Bonaval para uso do Museo do Pobo Galego está financiada polo Consorcio de Santiago, que investirá 2.735.901,56 euros.
Este espazo adecuarase para acoller novos espazos expositivos, oficinas e outros usos do Museo do Pobo Galego. A intervención prolongarase ata finais de 2020 e prevese que se inaugure de face ao próximo Ano Santo 2021, unha vez completada a musealización do espazo.
Ademais da creación dun núcleo de comunicación vertical, intervirase nas fachadas desta á sur do edificio e melloraranse as condicións térmicas. Todo iso nunha actuación que inclúe a limpeza e restauración da fachada do atrio da igrexa de Bonaval, as súas carpintarías e reixas históricas.
