Por Europa Press / Redacción | SANTIAGO DE COMPOSTELA | 20/09/2019 | Actualizada ás 19:19
A xunta de persoal do Concello de Ourense emitiu un comunicado no que reclama ao rexedor ourensán, Gonzalo Pérez Jácome, que cese nos seus "ataques" e "difamacións" contra os traballadores municipais.
Nunha reunión celebrada o pasado 13 de setembro, a xunta de persoal acordou por unanimidade emitir este comunicado, no que expresa o seu rexeitamento á actitude de Pérez Jácome e pide ao Partido Popular, socio de Democracia Ourensana no goberno da capital provincial, que "se manifeste publicamente sobre os improperios do alcalde cara aos que ata non fai moito eran os seus traballadores".
Así, censuran as "constantes e ofensivas declaracións, acusacións e difamacións" do rexedor "cara a todos os traballadores da Administración, que dependendo do servizo son vertidas con maior ou menor grao de inquina".
Por iso, reclaman a Jácome que "en primeiro lugar cese os seus continuos ataques" cara aos traballadores do Concello que el encabeza e que rectifique publicamente as "reiteradas agresións manifestadas tanto en medios de comunicación como en redes sociais".
Así as cousas, a xunta de persoal informa que solicitaron unha reunión co grupo municipal do PP para solicitar a posición dos populares sobre a actitude do alcalde.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.