Solicitan elevar a 25 anos a condena para o home que matou á súa sogra en Monte Alto
A acusación tamén solicita que, en lugar da prohibición de entrar na cidade da Coruña durante 30 anos, se estableza unha "orde de afastamento" cara á filla e netos da vítima.
Por E.P. | A CORUÑA | 24/09/2019 | Actualizada ás 13:31
A acusación particular na causa do home que matou á súa sogra no barrio coruñés de Monte Alto pediu que se eleve a condena de 20 a 25 anos de prisión, na vista de apelación celebrada na Sala do Civil e Penal do Tribunal Superior de Xustiza de Galicia (TSXG). Nela, a defensa solicitou a ampliación da eximente completa por drogadicción prolongada no tempo e trastorno da personalidade.
Tras o xuízo celebrado con xurado popular, foi condenado a unha pena de 20 anos de cárcere polo asasinato da súa sogra, de 73 anos, en Monte Alto en agosto de 2017. Ademais da condena de prisión, na que a Audiencia tivo en conta a atenuante de confesión, o fallo establece a prohibición de residir e achegarse ao termo municipal da Coruña durante 30 anos.
O letrado da acusación particular, Diego Reboredo, explicou aos medios de comunicación os motivos da apelación, na que solicita que "se aprecie a agravante de ensañamento" porque, di, "hai suficientes actos obxectivos para acreditar tanto as lesións á vítima como o odio probado do condenado cara a ela".
Esta parte tampouco está acordo coa atenuante de confesión aplicada ao condenado, pois esta "baséase nunha versión exculpatoria" que dá o home nun primeiro momento cando recoñece que "agrediu" á vítima porque empuxou á súa filla.
ORDE DE AFASTAMENTO
A acusación tamén solicita que, en lugar da prohibición de entrar na cidade da Coruña durante 30 anos, se estableza unha "orde de afastamento" cara á filla e netos da vítima. A defensa, pola súa banda, reclamou que se lle aplique ao condenado a eximente completa por drogadicción prolongada no tempo e trastorno de personalidade, o que supón unha rebaixa na condena.
O sospeitoso, segundo o fallo, dirixiuse á vivenda da súa sogra, á que culpaba da súa ruptura sentimental, "enfurecido" tras ver nunha rede social unha fotografía da súa exparella con outro home na praia. O día dos feitos, a vítima abriulle a porta do piso "confiada e sen pensar que houbese perigo".
Entón, o condenado aproveitou a súa complexión física e que estaba "desprevida" no corredor, preto da porta, para golpeala cos puños e propinarlle patadas por todo o corpo causándolle numerosas lesións ata asfixiala.
