Feridas cinco persoas ao caer unha ambulancia ao río en Touro con pacientes para diálese
Urxencias Sanitarias de Galicia-061 enviou dúas ambulancias asistenciais para atender a cinco pacientes, tres homes e dúas mulleres.
Por Europa Press / Redacción | SANTIAGO DE COMPOSTELA | 01/10/2019 | Actualizada ás 10:19
Cinco persoas resultaron feridas nun accidente de tráfico rexistrado na mañá deste martes no termo municipal de Touro (A Coruña) ao caer unha ambulancia ao río que levaba catro pacientes a diálese.
O sinistro tivo lugar sobre as 7,15 horas deste martes no lugar de Bendaña, ao precipitarse ao río unha ambulancia de transporte programado con catro pacientes para diálese e o condutor, informaron a Europa Press fontes da Garda Civil.
As mesmas fontes confirmaron que o condutor da ambulancia, que sufriu unha saída de vía e se precipitou ao río, obtivo resultado negativo na proba de alcoholemia.
O 112, tras recibir o aviso do sinistro, mobilizou a Urxencias Sanitarias de Galicia-061, aos Bombeiros do Deza e de Arzúa, á Garda Civil de Tráfico e ás Agrupacións de Voluntarios de Protección Civil de Vila de Cruces e de Touro.
Ao lugar, Urxencias Sanitarias de Galicia-061 enviou dúas ambulancias asistenciais para atender a cinco pacientes, tres homes e dúas mulleres.
En concreto, foron trasladados ao Hospital Clínico de Santiago os homes J.M.B., de 77 anos, e G.B.P., de 74, así como as mulleres M.C.S., de 60 anos, e I.C.R., de 75. Por suparte foi levado á Clínica Souto Boo o home J.L.R., de 54 anos, informaron fontes sanitarias.
