O PP acusa a Pedro Sánchez de "ferir de morte" o sector industrial da provincia da Coruña

O presidente provincial do Partido Popular da Coruña, Diego Calvo, acusou ao presidente do Goberno en funcións, Pedro Sánchez, de estar "a ferir de morte" o sector industrial da provincia coruñesa coas súas "decisións improvisadas".

"Desde a chegada dos socialistas ao goberno a nosa industria non fixo máis que recibir paus, xamais ninguén puxera tanto empeño en tentar arruinar un país, unha comunidade e unha provincia como fixo Sánchez", apuntou nunha reunión con afiliados e simpatizantes do PP na comarca de Betanzos.

No acto, considerou que Sánchez "engana" aos veciños da provincia coruñesa, "primeiro co estatuto das electrointensivas que nunca chegou", dixo, e despois cun "parche" que, na súa opinión, só atrasa o problema da planta de Alcoa.

Ademais, responsabilizou ao goberno socialista do anuncio de peche da planta que Endesa ten nas Pontes. "Todo o mundo sabe que son os culpables do problema por moito que agora tenten porse detrás dunha pancarta tratando de enganar á xente e de tirar balóns fóra", apostilou.