Pablo Casado anuncia en Galicia que o PP non pecha a porta a acordos co PSOE

O secretario xeral do Partido Popular, Pablo Casado, asegurou que os próximos comicios "van de desbloqueo" de España, unha situación que quere afrontar como "forza máis votada" para establecer pactos con "todos os partidos constitucionalistas, mesmo co PSOE".

Con estas declaracións, Casado abriu a porta este sábado en Oleiros (A Coruña) a ser o líder do "desbloqueo" que "paraliza o país". Fíxoo nun encontro no que os populares de toda Galicia deron o pistoletazo de saída á carreira electoral e mostráronse "preocupados" pola situación do sector industrial galego.

Alí, Casado viuse arroupado polo presidente do Goberno galego, Alberto Núñez Feijóo, ao que puxo como exemplo dun executivo "referente", "o que se fai na Xunta ten que facerse a nivel nacional", subliñou.

Os populares tamén buscan a "proximidade" cos cidadáns e din entender "o cabreo" que supoñen estas eleccións, pero animan a todos "os votantes de centro dereita", que apostan por un partido "reformista e liberal", a aglutinar o voto no PP, unha forza que "demostrou estar á altura nun momento complicado para España".

Para o candidato á Moncloa, o PP pode volver demostrar "gobernabilidade" e farao consolidándose como "a forza máis votada o 10 de novembro", nunhas eleccións que "ninguén quería", afirmou.

Despois dese día, avoga por pactar pero "encabezando esa disposición" de acordos para "salvar a España" dun "goberno presidido polos socialistas" que, ao seu xuízo, levarán a unha "terceira crise" que o mesmo Pedro Sánchez recoñeceu coa "desaceleración económica". Neste sentido, o líder popular apuntou que "sempre que o PSOE deixa unha crise, ten que ir o PP a salvar" o país.

PARTIDO "MODERADO E CENTRISTA"

Na súa intervención, Casado tamén se referiu á súa proposta de 'España Suma', a gran coalición de forzas de dereitas que o PP propuxo para estes comicios e que foi rexeitada por Ciudadanos. Así, o popular considera que o seu partido "xa o deu todo" e "non ten que facer nada" máis, porque estivo disposto a cambiar as siglas que "levan 40 anos en España" por aglutinar o voto "nunha soa plataforma".

O PP "demostrou ser un partido moderado e centrista que senta a dialogar" e que está disposto a "falar de abstencións e coalicións" cando sexa necesario, pero que está "preparado para gañar", porque así é como se conseguirá a "unidade".

Desde a súa perspectiva, chegou a hora de "facer máis e falar menos", dar "menos bandazos" e "menos quiebros de última hora" cos que se antepoñan "os intereses dun partido aos de España", que é o que "fixo Pedro Sánchez" desde o 28 de abril.

Ademais, tacha o presidente do Goberno en funcións de utilizar o "cansazo" da cidadanía como ferramenta para que se lle dea "a oportunidade de formar goberno". "Vostede non nos chamou, non nos escoitou, dixo que non somos un partido homologable para compartir Executivo", reprochoulle Casado.