As obras da nova residencia de maiores de Santiago, financiada por Amancio Ortega, comezarán en 2020

A conselleira de Política Social, Fabiola García, avanzou este martes que o obxectivo da Xunta é que comecen no primeiro semestre do 2020 as obras para construír a nova residencia de maiores de Santiago, financiada pola Fundación Amancio Ortega.

Respecto diso, detallou que a Administración autonómica se atopa neste momento "traballando na redacción do proxecto básico e de execución" desta infraestrutura que contará con 120 prazas. Con todo, non concretou sobre o prazo para acometela dadas "as dificultades que teñen estas obras de grande envergadura".

Así o manifestou a conselleira tras unha reunión mantida este martes nas instalacións da Xunta en San Caetano co alcalde de Santiago, Xosé Sánchez Bugallo, e a concelleira de Políticas Sociais, Milagres Castro.

Ambas as partes destacaron que se tratou dunha reunión "longa" e "bastante intensa", na que primou a "cordialidade" entre administracións, tal e como expresou o rexedor. Sobre a residencia, Bugallo definiuna como unha "prioridade absoluta" e manifestou a súa vontade de "acelerala todo o que poidan".

Fabiola García adiantou que esta construción, financiada pola Fundación Amancio Ortega tras unha doazón de 90 millóns á Xunta para acometer ese e outro seis centros nas cidades galegas, contará con "equipamento innovador" e a "última tecnoloxía" para atender as persoas maiores.

ATENCIÓN NO FOGAR E CEGADI

Pola súa banda, a concelleira Milagros Castro puxo o foco nas "poucas" prazas que dispón a capital galega nos centros de menores e abordou a necesidade de "mellorar" o servizo de axuda no fogar para a terceira idade. Sobre isto último, a conselleira asegurou que o Goberno galego "continuará incrementando" o número de horas "por suposto dentro sempre das circunstancias" de cada municipio.

Outra das infraestruturas nas que os representantes municipais fixeron fincapé foi o Centro Galego de Desenvolvemento Ingetral (Cegadi) para persoas con discapacidade de Salgueiriños, do que Fabiola García celebrou que "xa estea aberto".

Non en balde, aproveitou para pedir ao Goberno central "que se poña tamén en marcha" a parte residencial deste centro, para a cal xa existe un convenio asinado entre as administracións.

Así as cousas, o alcalde compostelán valorou a "gran receptividade" e o "compromiso" atopados na conselleira de Política Social durante esta reunión. García, pola súa banda, eloxiou a "lealdade institucional" de ambas as partes.