A rotura dunha tubaxe deixa sen auga á maior parte de Padrón

A rotura dunha tubaxe da rede de abastecemento do Concello de Padrón deixou sen servizo de auga corrente a boa parte do municipio coruñés, aínda que a concesionaria confía en que os cortes queden solucionados este luns.

En concreto, segundo a información proporcionada por Espina&Delfin ao Concello, foi na tarde deste domingo, ao redor das 18,30 horas, cando se tivo coñecemento dunha fuga de auga na zona de Herbón, onde se desprazou persoal do servizo municipal de augas.

Tras reparar o tramo afectado, e durante a posta en servizo, os técnicos comprobaron, con todo, a existencia de dúas roturas máis na mesma zona. Por iso, foi necesario cortar o servizo e proceder a substituír un tramo de nove metros de tubaxe, que se atopaba "moi deteriorada".

Ás 12,00 horas deste luns, a empresa iniciou a posta en servizo da rede, que se prolongará "durante un tempo estimado de cinco horas" para purgar as tubaxes e eliminar o aire acumulado.

"Posto que o alcance da rotura afectou á maior parte da rede de abastecemento, a restitución total do servizo da rede dependerá de como evolucionen os traballos de limpeza e purgado da rede", conclúen.