A Xunta acusa de non colaborar á Deputación de Pontevedra na eliminación de 'zonas de sombra' en emerxencias
O director xeral de Interior e Emerxencias, Santiago Villanueva, defendeu que a Administración autonómica "nunca escatimou esforzos de ningún tipo" para mellorar a cobertura naquelas zonas 'de sombra' do mapa de emerxencias.
Por E.P. | SANTIAGO DE COMPOSTELA | 16/10/2019 | Actualizada ás 16:21
O director xeral de Interior e Emerxencias, Santiago Villanueva, acusou ao goberno da Deputación de Pontevedra de non prestar colaboración para avanzar cara a eliminación das chamadas 'zonas de sombra' do mapa de emerxencias, é dicir, aquelas áreas con peor cobertura en caso dalgún incidente.
Fíxoo durante a resposta a unha pregunta formulada polo BNG durante a Comisión 1ª do Parlamento de Galicia na que o deputado Luís Bará cuestionou ao representante do Goberno galego sobre as medidas impulsadas para dotar de servizos de emerxencia aos concellos do interior de Pontevedra (Campo Lameiro, Cerdedo-Cotobade, Forcarei, Moraña, Ponte Caldelas e A Lama) e ao resto de áreas nas que o tempo de resposta é superior a 20 minutos desde que se recibe o aviso.
Bará lembrou que foi precisamente nesta zona do interior de Pontevedra onde se produciu o pasado fin de semana a morte dun home en Dozón, unha emerxencia na que a ambulancia do 061 non chegou ao lugar ata 46 minutos despois de recibir o aviso, como recoñeceron días despois fontes sanitarias.
Villanueva, tras expresar o seu pesar polo falecemento desta persoa, defendeu que a Administración autonómica "nunca escatimou esforzos de ningún tipo" para mellorar a cobertura naquelas zonas 'de sombra' do mapa de emerxencias.
Neste sentido, lembrou que "para solucionar" este problema "de forma coordinada entre as administracións competentes", a Xunta impulsou un grupo de traballo para a mellora da cobertura de emerxencia en toda Galicia.
Así, indicou que unha das principais conclusións deste grupo foi "a necesidade de ampliar o rango de actuación dos parques de bombeiros das cidades" como método para mellorar a atención destas áreas, unha iniciativa "apoiada por todas as deputacións, coa excepción da de Pontevedra, que non presentou ningunha alternativa". Así as cousas, culpou ao ente provincial gobernado polo PSOE e o BNG en "non mostrar ningún interese" na comarcalización dos parques das cidades.
SIMULACROS DE INCENDIOS
Por outra banda, Santiago Villanueva tamén respondeu este mércores en comisión a unha pregunta do Grupo Popular sobre os simulacros de lumes forestais recollidos no Plan especial de protección civil ante emerxencias por incendios na comunidade autónoma (Peifoga).
O responsable de Emerxencias e Interior defendeu a "efectividade" dunha medida que "garante que a resposta en caso de emerxencia sexa máis precisa, eficaz e mellor coordinada". Neste sentido, indicou que no que vai de ano realizáronse catro simulacros (un en cada provincia) de activación da 'situación 2' por incendio forestal, que fai referencia ao protocolo ante a proximidade das chamas a núcleos habitados.
Así as cousas, asegurou que estes simulacros permitiron "mellorar" a resposta dada aos grandes incendios forestais rexistrado en marzo en Rianxo e en setembro na Gudiña, emerxencias nas que houbo que activar a citada 'situación 2'. Entre ambos os incendios arderon ao redor de 1.500 hectáreas.
