A USC crea unha senda segura para evitar agresións machistas no campus sur de Santiago
Mellorarese a iluminación e limparanse varios camiños que conectan facultades e residentes e que agora están en mal estado de conservación.
Por Galicia Confidencial | Compostela | 16/10/2019 | Actualizada ás 21:00
A USC porá en marcha unha senda segura entre distintas facultades e organismos do Campus Sur para evitar posibles agresións machistas. A iniciativa foi impulsada pola Candidatura Unitaria Estudantil (CUE) tras varios anos de reivindicacións.
O obxectivo é "aumentar a seguridade" en zonas, ata agora semiabandonadas, e polas que transitan estudantes ao saír de clase polas noites para volver ás residencias universitarias aos seus domicilios. Esta senda segura terá unha mellor sinalización, e contará con farolas novas e de maior iluminación. Tamén se limpará a maleza, así como as gallas de árbores que a poidan tapar.
A CUE, a candidatura maioritaria na representación do estudantado no Claustro da USC, celebrou, nun comunicado, a aprobación por parte da universidade da creación desta senda degura no campus Sur, que conectará as residencias universitarias coas principais facultades, a biblioteca Concepción Arenal e o resto da cidade.
"Esta demanda do movemento estudantil xurdiu da inseguridade que transmite ao estudantado, particularmente as mulleres, o estado no que se atopan as rúas do campus sur,
froito do abandono e unha iluminación insuficiente", apunta nun comunicado a CUE. De feito, esta reclamación foi recollida en distintas asembleas abertas de estudantes, así coma a iniciativa Campus do Medo e o sindicato estudantil ANEGA.
