O asasino de Ponte Caldelas pide perdón

O autor confeso da morte a puñaladas de Manuel Rivas Muiños, marido da muller con quen mantiña unha relación sentimental, pediu perdón polo crime cometido en Ponte Caldelas e puntualizou que non se asañou con el.

Na última sesión do xuízo con xurado que se celebrou na Audiencia de Pontevedra os acusado Marcos V.G., autor confeso da morte a puñaladas de Manuel Rivas Muiños, fixo este xoves uso ao seu dereito á última palabra para pedir perdón á familia da vítima á que quixo "agradecerlles o respecto que mostraron en todo momento cara a min e cara á miña familia".

"Os feitos son os que son, nunca os ocultei, pero si hai un par de cousas que quero deixar claras", engadiu o acusado a continuación. A primeira cuestión que pretendeu aclarar é que do piso do matrimonio onde se produciu a agresión mortal "había tres xogos de chaves". "Unha de Sandra, outras na porta e logo as miñas", comentou, que apareceron debaixo da cama. "Non as entreguei porque non sabía onde estaban", abundou.

Ademais, asegurou que fixo unha foto a Manuel Rivas cando agonizaba e envioulla á súa parella "para que Sandra crese o que pasaba porque, a pesar de chamala, ela negábao" e quería que "chamase a unha ambulancia". "Non foi nin para facela sufrir nin para burlarme de Sandra en ningún momento, porque Sandra era a miña vida", manifestou. "Foi a muller da miña vida, que ninguén me fale mal de Sandra", engadiu.

"Non me asañei con el, a pelexa foi a que foi, acabou nun minuto e saquei a foto, mandeilla a Sandra para que chamase unha ambulancia e púxeno na cama. Non houbo máis, nin apuñalamento por detrás nin nada máis, foi todo alí no momento", concluíu o procesado na súa quenda de palabra.

DELIBERACIÓN

A deliberación do xurado popular empezará este venres despois de que as partes personadas na causa presentasen este xoves os seus informes e elevasen a definitivas as súas conclusións.

O fiscal do caso, Jesús Calles, sostén que o procesado é autor dun delito de asasinato con aleivosía e solicita unha pena de 20 anos de prisión, a prohibición de achegarse á viúva durante 25 anos e unha medida de liberdade vixiada durante oito anos máis. Engade no seu informe a circunstancia agravante de abuso de superioridade e que o acusado minguou as posibilidades de defenderse da vítima.

O avogado da defensa, Diego Reboredo, presentou unha protesta porque a Fiscalía non pedira ata agora este abuso de superioridade, de modo que considera que se lle privou da posibilidade de defenderse sobre este asunto.

A maxistrada que preside o tribunal, María Jesús Hernández, rexeitou esa protesta, pois considera que "o abuso de seguridade non deixa de ser unha aleivosía en segundo grao" e sobre a aleivosía si puido versar a súa defensa.

O letrado da defensa recoñece que o acusado é o autor dun homicidio e considera que debían aplicárselle as atenuantes de confesión, dilacións indebidas e arrebato, obcecación ou estado pasional. Retirou unha atenuante de lexítima defensa que esgrimira ao comezo da vista.

As acusacións particulares, personadas en nome da viúva e dos pais do falecido, piden para o acusado 25 e 20 anos de prisión.