Piden o cesamento do cargo da Xunta que falou de "revanchismo" con Franco pola súa exhumación

A Comisión pola Recuperación da Memoria Histórica da Coruña remitiu á conselleira de Medio Ambiente, Ángeles Vázquez, un escrito no que pide o cesamento do cargo da Xunta que, entre outras cuestións, censurou o "revanchismo" co ditador Francisco Franco, por mor da exhumación dos seus restos do Val dos Caídos.

En concreto, apuntan que o xefe de servizo de Conservación da Natureza en Ourense, Juan Gómez, apoiou "de forma descarada" o "franquismo máis rancio" situándose en contra da exhumación.

A entidade entende que é "cousa de cada un as ideas que defenda", pero remarcan que un cargo público, "cando é de libre designación", non pode situarse "tan claramente a favor dun bando, neste caso o franquista".

No escrito, trasladan á conselleira que, se o xefe de servizo en cuestión fose un funcionario "de sólida traxectoria", el sabería que a Deputación de Ourense "garda os nomes e datos de 646 persoas fusiladas en 64 municipios, máis de dous terzos do total de concellos da provincia".