Inés Iglesias espera un escenario no que Ciudadanos será "fundamental" despois das eleccións
O secretario de Organización en Galicia resta importancia ás enquisas e cre que a formación "volverá vencer" ás sondaxes. Apelan a unha nova lei electoral e apostan por "desaloxos express dos okupas"
- Reaccións CIS: O PP non se cre a enquisa que dá a vitoria en Galicia ao PSOE
- Inés Arrimadas súmase na Coruña ao discurso crítico da dereita pola exhumación de Franco
Por E.P. | SANTIAGO DE COMPOSTELA | 30/10/2019 | Actualizada ás 12:00
A cabeza de lista de Ciudadanos ao Congreso pola provincia de Ourense, Inés Iglesias, deu por feito este mércores un escenario no que Ciudadanos será "fundamental" despois dos próximos comicios electorais do 10 de novembro, "xa sexa no Goberno ou na oposición".
Así o explicou no acto de presentación da candidatura pola provincia Ourense celebrado no Hotel Princess e que contou coa participación dos números un ao Congreso e ao Senado, Inés Iglesias e Montserrat Lama, respectivamente.
Neste contexto, Inés Iglesias mostrouse convencida de que "Galicia estará ben representada cos candidatos de Ciudadanos no Congreso e no Senado", despois das próximas eleccións ás que dixeron "verse abocados" polos intereses doutros partidos políticos.
A candidata de Cs ao Congreso por Ourense quixo darlle a volta á "situación de bloqueo político que só interesa a Pedro Sánchez" e dixo ver nela "unha oportunidade" para obter un deputado por Ourense, despois de que nos pasados comicios do 28A quedasen "ás portas".
ENQUISAS "COCIÑADAS"
Nesta situación, o secretario de Organización de Ciudadanos Galicia, Laureano Bermejo, optou por desatender as sondaxes que anuncian unha nova repartición 2-2 entre o PP e o PSOE dos escanos para o Congreso pola provincia de Ourense.
Respecto diso, considerou que se trata dun tema "moi manido", en palabras de Bermejo, que precisou que "se fora polas enquisas Ciudadanos non existiría". Mostrouse convencido de que a formación laranxa "volverá vencer" a todas as sondaxes.
Así mesmo, Laureano Bermejo abundou en que as enquisas están "cociñadas nun despacho da Moncloa" e que, nesta ocasión, parece que "ao CIS se lle queimou a cociña". Na mesma liña, avogou pola postura do seu partido que mantén que "a persoa a cargo da elaboración das enquisas debe ser o máis aséptica posible", algo que di "non estarse cumprindo".
NOVA LEI ELECTORAL
Durante a súa intervención, a candidata ao Congreso especificou as principais medidas que contempla a súa organización no seu programa electoral. Entre elas, destacou a "xusta" creación dunha nova lei electoral "na que os nacionalistas non teñan a chave para gobernar España".
Tamén incidiu na necesidade de medidas "máis esixentes" cos delincuentes reincidentes e a aposta por "desaloxos express dos okupas". As propostas de Ciudadanos de cara ao 10N, segundo detallou Inés Iglesias, tamén contemplan "axudas para que formar unha familia non resulte unha misión imposible", tales como cursos de inglés gratuítos, libros gratis e dentista sen custo para os menores de 16 anos.
Por outra banda, precisou que "Ciudadanos aposta por despolitizar a xustiza e acabar cos 'dedazos' e o enchufismo". Inés Iglesias tamén se comprometeu a "acabar co paro e a precariedade laboral, así como a garantir as pensións e mostrar o seu apoio aos autónomos". Por último, falou da aposta de Ciudadanos para "desenvolver e implementar unha lei de morte digna".
