Pablo Casado usa o AVE que nunca trouxo o PP a Galicia como arma política contra o PSOE

O líder do PP e candidato á Presidencia do Goberno visita Lalín nun acto de campaña ao que asitiron unhas 1.500 persoas.

Por Europa Press / Redacción | Lalín | 02/11/2019 | Actualizada ás 18:54

Comparte esta noticia

O presidente do PP, Pablo Casado, comprometeuse a que o AVE chegue a Galicia para a celebración do próximo Xacobeo, no ano 2021, e reivindicou que a infraestrutura necesaria para iso "non se empezou a construír" ata que o PP chegou ao Goberno. "Aquí hai que vir con orzamento constante e sonante", engadiu. Casado obviou así as promesas do PP cando estaba no Goberno central dirixido por Mariano Rajoy, que atrasou a chegada da alta velocidade a Galicia, e focalizou toda a responsabilidade no Executivo socialista.

O presidente do Partido Popular, Pablo Casado, durante un acto en Lalín
O presidente do Partido Popular, Pablo Casado, durante un acto en Lalín | Fonte: Europa Press

Durante un mitin celebrado no segundo día de campaña en Lalín (Pontevedra), o líder dos populares reservou a parte final do seu discurso para falar de Galicia e afear ao presidente do Goberno en funcións, Pedro Sánchez, que "non dixese nada" das "necesidades" desta autonomía "puxante" as últimas veces que a visitou.

"Aquí veño falar sobre Galicia, a Galicia e para Galicia. Cando veño a Galicia, veño a comprometerme. Aquí non vimos de visita", proclamou fronte a máis de 1.500 afiliados e simpatizantes que se achegaron ata a nave industrial na que se celebrou o acto. Entre eles estivo o presidente do PPdeG e da Xunta, Alberto Núñez Feijóo; a número dous por Madrid ao Congreso, a exministra Ana Pastor; e a candidata por Pontevedra, María Ramallo.

Neste contexto, asegurou que a súa presenza en Lalín é para "comprometerse" con Galicia, porque "o voto non se pide gratis". Por iso, e porque considera que as administracións teñen que ver o próximo Ano Santo como "unha oportunidade", asegurou que "apoiará" a súa celebración se é presidente e prometeu que "a ese Xacobeo a xente poida vir en AVE".

Acto seguido, Casado lembrou que nos anos 90 o exministro de Transporte e actual alcalde de Vigo, o socialista Abel Caballero, acudía a Galicia para dicir que "traerían o AVE". Con todo, "o AVE a Galicia non se empezou a construír ata que veu unha administración do PP", proclamou o presidente popular, rememorando ademais que o seu número dous, Ana Pastor, foi ministra de Fomento con Mariano Rajoy. Fíxoo obviando que as promesas do PP respecto do AVE nunca se cumpriron.

"PREOCUPA MOITO" A INDUSTRIA GALEGA

Así mesmo, o candidato do PP á Presidencia do Goberno expresou que lle "preocupa moito" a situación da industria galega, un sector "mundialmente recoñecido" pero que agora atravesa unha crise debido á incerteza sobre a planta de Alcoa San Cibrao, en Cervo (Lugo), ou a ameaza de peche da central de Endesa nas Pontes de García Rodríguez (A Coruña).

"Levamos todo o ano falando disto e chamáronnos agoreiros. Alcoa, Ence, As Pontes, PSA de Vigo, Navantia... Que máis necesita o Goberno para facer algo pola industria galega? Que máis ten que pasar?", preguntouse.

Neste sentido, reclamou que o Executivo estatal "se comprometeu" coa industria. "E fareino eu", apostilou Casado, prometendo ademais a aprobación do estatuto das electrointensivas, que "beneficiará a miles de familias" que "están agora pasándoo mal".

O presidente do PP estatal dixo que toda esta situación da industria galega pasa "por unha mala política" por parte do PSOE desde o Estado.

O líder do PP e candidato á Presidencia do Goberno recalcou que o Partido Popular é a única opción que pode desaloxar ao socialista Pedro Sánchez do Palacio da Moncloa e pediu aos seus que saian á rúa "pisando forte" co obxectivo de "convencer aos indecisos" con esa mensaxe, nun momento en que o partido "ten as mesmas opcións" para gobernar que o Partido Socialista.

"De todos os candidatos que nos presentamos ás eleccións só hai unha opción que garante a alternancia a Pedro Sánchez. Hoxe o PP ten as mesmas opcións de gobernar que Pedro Sánchez", asegurou, para engadir que o candidato socialista tiña posibilidade de chegar a acordos tras as xerais de abril pero decidiu organizar un "referendo" o 10 de novembro "de forma caprichosa" e "en clave persoal".

O presidente do PP considera que o seu partido pode conseguilo se logra aglutinar o voto do centro-dereita tras a fragmentación que se produciu en abril e "convencer a aqueles indecisos de que votando polo Partido Popular" vanse a defender "os seus intereses sen sectarismos, sen intolerancia e coa fiabilidade do que hai que facer en España para mellorar a economía e a unión territorial" de España.

ACTO EN LALÍN PARA RECUPERAR POSICIÓNS EN GALICIA

Nesta segunda "oportunidade" que ofrecen as xerais, o PP quere recuperar posicións en Galicia, onde o partido sufriu un revés electoral nos comicios do 28 de abril, xa que o PSOE arrebatou o primeiro posto aos 'populares' nun cento de concellos e gañou en todas as cidades.

No seu discurso, Feijóo afirmou que teñen a posibilidade de ter "unha España mellor" votando a Casado o 10 de novembro e chamou a converter a "desgana" dos cidadáns en cambio nas urnas. Dito isto, apelou a aglutinar o voto no PP porque "cada voto sen escano a Vox ou Ciudadanos son máis escanos para un Goberno do PSOE con populistas e nacionalistas".

Tras recalcar que o "único cambio posible o 10 de novembro é votar ao PP", acusou o Partido Socialista de tentar "buscar reclamos para dividir o voto da dereita en España" e de dar "protagonismo mediático" a Vox. "Se nos dividen vencerá a minoría socialista nas urnas", advertiu, para recriminar a Sánchez que, a diferenza do que fixeron os seus antecesores, non saian a gañar senón a "dividir" o voto do centro e a dereita.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta