Dous mortos e tres feridos nun accidente entre dous vehículos en Ames
O sinistro produciuse sobre as 14,00 horas na estrada entre Negreira e Bertamiráns, na AC-544.
Por Europa Press / Redacción | SANTIAGO DE COMPOSTELA | 02/11/2019 | Actualizada ás 18:58
Un accidente entre dous vehículos á altura do municipio de Ames (A Coruña) saldouse con dous falecidos e tres persoas feridas, informaron fontes do 112.
O sinistro produciuse sobre as 14,00 horas na estrada entre Negreira e Bertamiráns, na AC-544, á altura do desvío cara a Brión.
Un particular alertou ao 112 do accidente e de que podería haber varios feridos e persoas atrapadas. O servizo de Emerxencias informou ao 061, Garda Civil, Protección Civil de Ames, Ges de Brión e efectivos de Bombeiros.
Os membros dos corpos de seguridade desprazados confirmaron posteriormente que dous dos implicados no accidente faleceran e que había outras tres persoas feridas, dúas delas atrapadas e foi necesario excarcerar.
