Éxito da folga do alumnado de Medicina que baleira as aulas para pedir que non os consideren números
O decano recoñece que existen carencias que "son costumes ascentrais que se mantiveron" e non foron quen de modificar e asegura: "Estamos no mesmo barco".
Por Europa Press / Redacción | SANTIAGO DE COMPOSTELA | 05/11/2019 | Actualizada ás 14:50
A facultade de Medicina de Santiago plantouse este martes ante os problemas do centro. O alumnado baleirou as aulas este martes nunha xornada de paro, concentracións e reivindicacións para tentar que lla Universidade de Santiago aborde as carencias que sofre tanto a docencia e a organización das clases como o estado do inmoble e que non os consideren simples números.
O apoio superou as expectativas da propia Asemblea de Aberta de Medicina. Unha dos portavoces do alumnado trasladou a Europa Press o "incrible" éxito da convocatoria, dado que Medicina é unha facultade "difícil de mobilizar" pola cantidade de traballo que deben afrontar os estudantes ao longo do curso.
"Conseguimos baleirar todas as aulas. Á primeira hora da mañá non había ninguén en primeiro, segundo, terceiro... e en cuarto e quinto algunha persoa", explicou, ante un corredor "repleto de xente, motivada," protagonizando unha sentada nas escaleiras principais do centro para denunciar a situación e as dificultades que afrontan pola organización de clases e de materias.
Mentres, os representantes e delegados do alumnado participarán nunha reunión co decanato da Facultade para abordar as reivindicacións e denuncias que expoñen. Doutra banda, tamén estaba previsto un encontro co reitor, Antonio López, ou un representante da rectoría.
DESORGANIZACIÓN DOCENTE
Os estudantes denuncian a falta de prácticas "útiles", posto que moitos "ou non se imparten" ou se fan "como expositivas", polo que dificulta a adquisición dese "coñecemento práctico" que necesitan para formarse tendo en conta a carreira que cursan e o seu futuro laboral.
A iso sumaron a "mala organización docente, os horarios abusivos" e a inxusta ponderación e requisitos para aprobar determinadas materias, nas que se esixe un sete que se convertería nun cinco. Isto sitúa ao alumnado "nunha clara desvantaxe" respecto doutras facultades á hora de presentarse ao MIR ou para optar a bolsas de estudo.
Doutra banda, esta representante do alumnado denunciou o caso dalgúns estudantes de 5º que teñen que desprazarse a centros de Rianxo ou Ribeira, entre outros, en transporte público e custeándollo eles mesmos, o que lles supón gastos de "máis de 200 euros ao mes", un custo "inasumible para un alumno".
"ESTAMOS NO MESMO BARCO"
O decano de Medicina, Julián Álvarez, recoñeceu que parte dos problemas denunciados polos estudantes existen e que "hai cousas nas que teñen razón", mostrándose disposto a "buscar solucións". "Hai unha presencialidade excesiva, certos problemas de absentismo de profesores por problemas de coordinación, hai aulas que non están excesivamente ben mantidas, gustaríanos ter máis recursos para mellorar a docencia", recoñeceu, asegurando que están "no mesmo barco".
Álvarez lembrou, ademais, que está problemática non se deu "este curso", senón que vén herdado doutros anos, posto que se vive nun sistema "bicameral" no que o decanato ten "poucas competencias" e os diferentes departamentos son "illas" nos que recae a "responsabilidade" da docencia".
"Son costumes ascentrais que se mantiveron e non fomos capaces de modificar", recoñeceu, aínda que asegurou que están dispostos a "buscar solucións", abordando as cuestións "punto por punto" e que respectan "exquisitamente o dereito a folga e manifestación".
Neste sentido, recoñeceu será "moi difícil" abordar peticións como a coincidencia de materias entre cursos, sobre todo "nunha facultade tan sobrecargada" e ten un número de aulas determinadas que dificultan esta medida.
