O Gaiás exhibirá ao público o manuscrito da nobre romana Egeria co camiño que a levou de Galicia a Terra Santa
A pesar de que o manuscrito se conserva incompleto, trátase dunha das fontes máis valiosas para coñecer o papel da muller ao final do Imperio Romano, a espiritualidade da época ou a transición entre o latín culto e o vulgar que, posteriormente, daría lugar ás linguas romances.
Por E.P. | SANTIAGO DE COMPOSTELA | 07/11/2019 | Actualizada ás 18:07
O primeiro relato de viaxes do que se ten constancia en España foi escrito hai 16 séculos por unha aristócrata da Gallaecia romana, Egeria, que recolleu nel a súa peregrinación a Terra Santa. O manuscrito máis antigo no que se narra esta viaxe, datado do século XI, está xa no Museo Centro Gaiás, onde chegou procedente da biblioteca italiana de Arezzo para exhibirse dentro da mostra 'Galicia, un relato no mundo', incluída na programación do Xacobeo 21 e que se inaugurará a próxima semana.
Egeria está considerada a primeira muller escritora da que se ten constancia na Península Ibérica, así como a primeira peregrina que relatou a súa viaxe nun diario, escrito a modo de cartas nas que describía aqueles lugares que percorría e que inclúen Exipto, Antioquía, Edesa ou Constantinopla.
A 'Peregrinatio Egeriae' está recollida no Codex Aretinus 405, descuberto en 1884 por Gian Francesco Gamburrini na Biblioteca Arezzo. Este texto data do século XI, cando foi transcrito a partir dun manuscrito anterior.
Desde o seu descubrimento, o 'Itinerario de Egeria' foi obxecto de numerosas edicións e traducións en todo o mundo. A pesar de que o manuscrito se conserva incompleto, trátase dunha das fontes máis valiosas para coñecer o papel da muller ao final do Imperio Romano, a espiritualidade da época ou a transición entre o latín culto e o vulgar que, posteriormente, daría lugar ás linguas romances.
A exposición 'Galicia, un relato no mundo' explora os mitos, a historia e a memoria da identidade galega ao longo do tempo e do mundo. Para iso, agrupa máis de 300 pezas entre as que destacan elementos da relevancia do Libro das Invasións, o Mapa de Sawley, a Biblia Kennikott ou a 'Santa' de Francisco Asorey.
