Temas: ELECCIóNS 10N

Estar coa familia, comprar roupa de bebé ou tomar o vermú, plans dos políticos para a xornada de reflexión

O polbo e as castañas protagonizarán os menús dos aspirantes galegos ás Cortes.

Por Europa Press / Redacción | SANTIAGO DE COMPOSTELA | 08/11/2019 | Actualizada ás 19:27

Comparte esta noticia

Pasar o día coa familia e os amigos, comprar roupa para un bebé que vén camiño e tomar o vermú son algúns dos plans que os políticos galegos escolleron para a xornada de reflexión tras unha semana de campaña electoral.

Papeletas
Papeletas | Fonte: EP.

Así, en primeiro lugar, o secretario xeral dos socialistas galegos, Gonzalo Caballero, aproveitará este día de descanso entre a intensa campaña e as eleccións para estar coa súa familia e amigos.

O xefe de filas do PSdeG tamén ten previsto acudir aos premios da crítica en Vigo este sábado, cando os candidatos socialistas farán distintos plans como ir comer polbo, polo que optará a 'número un' dos socialistas ao Congreso por Ourense, Marina Ortega.

Pola súa banda, a cabeza de lista do PP á Cámara baixa pola Coruña, Marta González, estará en Bertamiráns e Brión coa súa familia antes de asistir a un magosto en Santiago con compañeiros de partido. Esta celebración típica do outono galego será tamén a opción elixida polo 'número un' por Pontevedra, María Ramallo.

O candidato do PP ao Congreso por Lugo, Jaime de Olano, estará coa familia, propósito que tamén foi escollido pola aspirante por Ourense, Ana Belén Vázquez, que irá recoller cogomelos, unha das súas afeccións favoritas.

COMPRAR LIBROS

Este sábado, a 'número un' de En Común Unidas Podemos por Pontevedra ao Congreso, Yolanda Díaz, aproveitará o día de "parón" da maquinaria electoral para pasear coa súa parella e a súa filla, á que irá comprar un libro.

Os achegados serán tamén a opción dos cabezas de lista da formación pola Coruña, Antón Gómez Reino; Ourense, David Bruzos; e Lugo, Vanesa Somoza.

ANIVERSARIOS INFANTÍS E ROUPA DE BEBÉ

Mentres que a aspirante de Ciudadanos ao Congreso por Ourense, Inés Iglesias, tamén pasará o día coa familia; a candidata por Pontevedra, Beatriz Pino, tomará o aperitivo co seu equipo de campaña en Vigo.

Todo iso, nunha xornada na que a candidata á Cámara baixa pola Coruña, María Vilas, irá cos seus achegados a unha tenda de roupa para bebés en Santiago de Compostela para comprar algunha cousa para a súa futura filla.

Así mesmo, o candidato por Lugo, José Manuel Blanco, acudirá a uns aniversarios infantís ao que convidaron as súas fillas antes de ir a unhas xornadas da Fundación Uxía Novoneyra sobre museos.

En canto ao BNG, a súa líder, Ana Pontón, tomará un vermú na Praza de Abastos de Santiago acompañada polo 'número un' do BNG ao Congreso pola Coruña, Néstor Rego. Ademais, tamén participarán militantes.

Temas: ELECCIóNS 10N
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta