O portavoz da patronal galega espera que o pacto entre PSOE e Unidas Podemos "non se concrete"

O portavoz da patronal de Galicia (CEG), Antonio Fontenla, ten "esperanza" en que o acordo de Goberno asinado por Pedro Sánchez e Pablo Iglesias acabe por non concretarse.

Ao seu xuízo, este pacto entre o líder do PSOE e de Unidas Podemos espertou "preocupación" no sector empresarial de Galicia, segundo explicou Fontenla este domingo nunha entrevista na Radio Galega recollida por Europa Press.

No caso de que chegase a fraguarse un Goberno entre ambas as forzas progresistas, Fontenla insta a que se actúe con "rigor orzamentario e ortodoxia económica" para o país.

Cre que se a ministra de Economía no Goberno de Sánchez, Nadia Calviño, volvese repetir o cargo, iso "daría seguridade aos empresarios", pero matiza que "o problema" xurdiría se o Goberno non fose "homoxéneo". "Se son dous gobernos, o tema é distinto", apostilou.

Entre as reclamacións do portavoz atópase a aprobación dun estatuto electrointensivo para a industria eléctrica galega. Na súa opinión, esta debería ser "a primeira medida que se tome" xa que "non hai marcha atrás". "Pode chegar un momento en que o consello de administración de Alcoa canse e diga que pecha" a factoría en Galicia.

Ademais, tamén urxiu medidas para "salvar a térmica de Endesa nas Pontes" que precisa de "alternativas ao carbón para manter a actividade da planta". Sobre a central tamén alarmou con que "a empresa ten bastante avanzada a decisión de pechar se non hai solución".

Na lista de demandas, Fontenla incluíu que o Goberno "tome posición" ante Pemex para abordar a situación de Barreras. A empresa mexicana é unha entidade pública "e non pode ter perdas, pero haberá que buscar unha solución", como a garantía "de que vai recuperar o diñeiro que puxo".

"Parece que nos botaron un mal de ollo", asegura o portavoz da patronal despois de destacar a súa visión sobre a situación da industria galega. Con todo, cre que Galicia "está mellor preparada que outras comunidades do resto de España" para afrontar o novo escenario de "desaceleración".

Por outra banda, fixo referencia á situación institucional da CEG, que "nuns días, seguramente este mes, convocará unha asemblea para aprobar as contas de 2018 e eleccións" para representar ao órgano.

O portavoz da CEG, Antonio Fontenla