Mato di que o centro de excelencia do naval "ten que estar" en Ferrol

O alcalde de Ferrol, Ángel Mato, asegurou que o Centro de Excelencia do Sector Naval "ten que estar e vai estar" na súa cidade, en alusión ao anuncio que realizaron días atrás Navantia e a multinacional Siemens de instalar na capital de Galicia unhas instalacións que está previsto que supoñan un soporte para o desenvolvemento das fragatas F-110 para a Armada Española. "Penso que a decisión que se tomou non é acertada", destacou o rexedor socialista en declaracións aos medios de comunicación este martes.

Mato tamén incidiu en que "o xemelgo dixital que se vai a pór en marcha ten que estar en Ferrol, algo que é básico e fundamental". Respecto diso, convocou unha xunta de portavoces "para tentar realizar unha declaración institucional, apoiada por todos os grupos do Concello, para solicitar de Navantia e do Goberno que traballen a favor de que Siemens sitúe este centro na cidade de Ferrol".

Ángel Mato tamén resaltou que "é imprescindible contar co apoio da Administración autonómica" e así propuxo a creación do Centro de Excelencia do Sector Naval "nas instalacións do CIS da Cabana". En calquera caso, opinou que tanto a Universidade como o Concello de Ferrol "estarían dispostos para acoller este centro".

PORTAVOCES

Algúns portavoces municipais como o do Partido Popular, José Manuel Rei Varela, reclamaron "a unión de todos os partidos para defender os intereses do sector naval, nunha cidade que estivo tan castigada e que non pode perder nin unha soa oportunidade". É por iso que o popular pediu "instar a Navantia e ao Partido Socialista a que reconsidere esta posición e que sitúe en Ferrol o Centro de Excelencia do Sector Naval".

"Na nosa cidade, onde está a sede de Navantia, as sedes das industrias auxiliares, un centro de innovación e servizos, o CIS da Cabana, ademais dun magnifico campus industrial, onde se forman os mellores especialistas no sector naval", subliñou. Tamén o portavoz de Ferrol en Común, Jorge Suárez, reclamou "unha declaración institucional para esixir que este centro quede na comarca" e pediu "instar a Navantia a asinar unha adenda ao acordo con Siemens para a centralización desa instalación na comarca".

CC.OO.

O secretario xeral de Industria de CC.OO. en Galicia, Víctor Ledo, asegurou que o relativo "á construción do sector naval e vinculado a un contrato con Navantia" no centro de excelencia do sector naval "vai ter que ser en Ferrol si ou si", á marxe de que Siemens "nas súas oficinas poderá facer o que queira".

Así de rotundo se manifestou o representante sindical nunha rolda prensa na que remarcou a posición desta organización con respecto ao acordo ao que chegaron a empresa naval publica e a multinacional alemá para desenvolver este centro en Santiago.

Díxoo acompañado por Nuria Fernández, secretaria xeral de CC.OO. Industria na comarca de Ferrol, os responsables das seccións sindicais deste sindicato nos estaleiros de Ferrol e Fene, ademais do responsable CC.OO. na zona das Pontes de García Rodríguez.

Neste escenario, Ledo denunciou o proceso de "desindustrialización que está a sufrir a comarca" e citou o caso da central térmica de Endesa nas Pontes de García Rodríguez, Siemes-Gamesa nas Somozas e o sector naval na ría de Ferrol. De todo iso culpou en parte ás "decisións políticas" e incidiu en que "a transición enerxética e a dixitalización, no caso de Navantia, están a afectar".

Así, destacou que para o próximo 28 de novembro está convocada unha mobilización comarcal, que partirá ás 20,00 horas desde a praza de España de Ferrol, "para pedir solucións". Ademais, CC.OO. deu a coñecer algunhas das súas propostas, como o sector eólico, tanto en terra como 'offshore', "coa creación dun centro tecnolóxico de enerxías renovables en Ferrolterra, algo que parece que está de moda, pero non se materializa". Baixo o seu punto de vista, podería supor o minimizar "esa transición ecolóxica inxusta e abrupta", pero "aínda non se sabe o que vai pasar nuns meses".

ENDESA

En canto á decisión de Endesa de minimizar a produción de enerxía eléctrica desde a súa central térmica das Pontes, Ledo trasladou que "isto non se pode consentir por ningunha das administracións". "Non pode anunciar unha descontinuidade por unha decisión de tipo económico, porque se adaptou aos acordos da Unión Europea e por iso non ten que pechar, senón que o quere facer agora, o peche, por temas económicos", expuxo.

Por iso esixiu que Endesa "non deixe de producir enerxía, tal e como tiña comprometido, ata o ano 2035, para facer unha transición xusta, e gañar tempo para pór en marcha os proxectos de enerxía renovables".

Así, puxo como exemplo a situación en Alemaña, onde "as centrais térmicas van prolongar a súa vida ata o ano 2038, moitas delas experimentando xa un proceso mixto entre carbón e biomasa, pero en paralelo facendo un desenvolvemento do sector eólico galopante". "Mentres, nós estamos de perfil, cando podemos ser a bandeira deste sector", contrapuxo.

SIEMENS-GAMESA

Con respecto á planta de fabricación de pas de aeroxerador que a multinacional Siemes-Gamesa ten nas Somozas, que dá emprego directo a máis de 300 traballadores, Ledo alertou de que todo o mundo sabe "que acaban de comprar unha empresa en Portugal, Senvion, e que a ameaza da deslocalización a este país é inminente e non hai ningunha garantía de que isto non suceda".

Desde o seu punto de vista, isto podería non suceder se "Siemens-Gamesa estivesen dentro dese polo de trasformación enerxética na comarca".