A Marcha Mundial das Mulleres denuncia na campaña polo 25N "violencia xudicial"

A Marcha Mundial das Mulleres inicia unha campaña con motivo do próximo 25N que pon o foco na violencia xudicial contra as mulleres e os seus fillos. Un tipo de violencia que, segundo precisaron, no peor dos casos termina por facer que as mulleres se cuestionen a propia denuncia machista.

Un feito que, segundo sinalou este xoves en Ourense a Coordenadora Galega da Marcha Mundial das Mulleres, ocorre porque "as leis de igualdade e contra a violencia machista definen un marco legal de protección ás mulleres que non se está facendo efectivo na súa aplicación".

"Cada día nas comisarías e xulgados de Galicia, mulleres que denuncian violencia machista ven violentados os seus dereitos á defensa, a protección das súas fillas ou a protección fronte aos seus agresores", sinala.

Entre os fallos do sistema xudicial, a Marcha Mundial das Mulleres detectou "a falta de asesoramento cando se decida denunciar, no momento da denuncia e do ateigado policial que as acompañará durante todo o proceso posterior".

Ademais, tamén criticaron por parte deste colectivo que "na mesma orde se dite afastamento para os agresores e visitas do agresor aos fillos; réximes de visitas para agresores sexuais dos fillos e informes que culpabilizan ou revictimizan as mulleres".

Por todo estes motivos, a Marcha Mundial das Mulleres reclamou ás institucións información pública sobre o procedemento da denuncia machista e os dereitos das mulleres e formación específica de todo o persoal e axentes que atenden a estas mulleres.

MEDIOS

Tamén recalcaron a necesidade de dotar aos CIMM de Galicia de medios suficientes para a atención e asesoramento de mulleres que sufran violencia, así como solucións económicas reais para as mulleres que denuncian violencia machista, entre outras.

A Coordenadora Galega da Marcha Mundial das Mulleres recollerá firmas por toda Galicia para pedir á Xunta que inste ao Ministerio de Xustiza e ao goberno do Estado a aplicar a lexislación en materia de violencia machista retirando as visitas dos fillos a homes denunciados por agresións machistas ata a existencia dunha sentenza firme, do mesmo xeito que cos homes denunciados por agresión sexual ou malos tratos infantís ante sentenza firme.