Por E.P. | A Coruña | 21/11/2019 | Actualizada ás 16:35
O pleno da Deputación da Coruña aprobou este xoves, cos votos a favor do PSOE, BNG, Marea Atlántica e Alternativa dos Veciños e en contra do PP, as contas da institución provincial para 2020, que ascenden a 184 millóns, o que supón un incremento do 0,22% respecto das contas deste ano.
Entre os capítulos de investimentos, destacan os máis de 72 millóns destinados a plans de Emprego, entre os que se atopa o Plan Único, cunha consignación inicial de 41,2 millóns de euros. Á área de acción social, o organismo provincial destina 11,8 millóns; e 10,1 millóns son para o departamento de Cultura, que inclúe 2,5 millóns para a Rede Cultural.
Destacan tamén os máis de 18 millóns destinados aos programas de obras, conservación e construción de sendas e mellora de travesías.
Na sesión, o deputado do PSOE, Antonio Leiro, destacou o compromiso das contas da Deputación cos concellos, de cara a "priorizar os seus servizos básicos".
Pola súa banda, desde o PP, a deputada Rosa Gallego, lamentou que o goberno provincial leve a pleno un orzamento "sen convocar a xunta de portavoces".
"Estamos absolutamente decepcionados cos orzamentos", manifestou a popular, que critica o incremento do 8,4% en publicidade e o descenso nun 10,7% dos investimentos para os concellos coruñeses.
Mentres, Ángel García Seoane, de Alternativa dos Veciños, incidiu na necesidade de mellorar as estradas provinciais, que é "a materia pendente" da Deputación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.