Gonzalo Caballero vota "si" ao acordo entre PSOE e Unidas Podemos que "free as dereitas e ultradereitas"
O secretario xeral do PSdeG participa na consulta sobre o pacto asinado.
Por Europa Press / Redacción | VIGO | 23/11/2019 | Actualizada ás 13:42
O secretario xeral do PSdeG, Gonzalo Caballero, votou "si" na consulta do PSOE sobre o acordo asinado con Unidas Podemos que, segundo as súas palabras, permitirá formar un Goberno "forte" e "de progreso" que "free as dereitas e ultradereitas".
En declaracións ao acudir a votar na sede da formación en Vigo, o líder dos socialistas galegos mostrouse "convencido" de que "é necesario abrir acordos e diálogos" entre forzas para que haxa un Executivo "progresista e nucleado polo Partido Socialista e presidido por Pedro Sánchez".
"É un si ao progreso de España, é un si para formar Goberno e evitar terceiras eleccións e é un si para bloquear as dereitas e as ultradereitas que están a tentar alcanzar niveis de control político que implicarían un retroceso para o noso país", resumiu.
Ademais, para o secretario xeral do PSdeG, votar a favor do pacto é dicirlle "non" a ese Partido Popular "xa liderado desde dentro por Aznar e orientado ideoloxicamente por Vox", algo que lle "preocupa moitísimo".
Preguntado sobre como cre que concluirá a consulta ás bases, Caballero apelou a "esperar" ao resultado, aínda que asegurou que percibe a "moitísimos militantes encantados" co acordo entre PSOE e Unidas Podemos.
