Por Europa Press / Redacción | A CORUÑA | 25/11/2019 | Actualizada ás 13:19
A Real Academia Galega (RAG) acolleu este luns a presentación da edición especial facsimilar dos manuscritos que se conservan da escritora galega Rosalía de Castro.
Baixo o título 'Rosalía de Castro: obra poética e manuscritos' de Boreal Edicións, reúnense diversas pezas da escritora galega máis universal.
O presidente da RAG, Victor Freixanes, acompañou ao editor Manuel Mariño e á artista Gosia Trebacz, autora das nove obras gráficas que inclúe esta tirada singular que xunta os manuscritos de Rosalía que se conservan.
O libro, do que se publicarán 330 exemplares, inclúe o conxunto da obra poética de Rosalía de Castro en galego e castelán, o único relato en prosa que redactou en galego e as dezaseis cartas escritas por ela exhumadas a día de hoxe (catro delas en estado fragmentario), todo isto acompañado da reprodución facsimilar dos manuscritos autógrafos da autora e a súa correspondente transcrición.
Os textos orixinais reproducidos consérvanse na Real Academia Galega, o Arquivo Municipal da Coruña, o Arquivo da Deputación da Coruña, o Museo de Belas Artes da Coruña, a Fundación Rosalía de Castro, a Fundación Penzol e arquivos privados.
UNHA HOMENAXE A ROSALÍA
"Este libro concíbese como unha celebración e, ao mesmo tempo, como unha homenaxe. Non substitúe outras iniciativas, por suposto, pero o editor merece as felicitacións", subliñou o presidente da RAG na presentación dunha obra que constitúe "un esmerado produto editorial" que contén "o tesouro da palabra, unha das voces máis intensa, auténticas, comprometidas e libres da literatura de todos os tempos".
Pola súa banda, para o editor, Rosalía é unha "voz universal e feminista". E é que a escritora é unha pioneira do feminismo na literatura, por iso a presentación da súa facsimilar tivo lugar no día internacional da eliminación da violencia contra as mulleres.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.