O excontable da confraría do Grove recoñece que se gastou no casino uns 200.000 euros da asociación
Relata os seus problemas de ludopatía, pero nega que a cantidade ascenda a medio millón de euros, como sostén a fiscalía.
Por Europa Press / Redacción | SANTIAGO DE COMPOSTELA | 26/11/2019 | Actualizada ás 17:00
O excontable da confraría do Grove, Fabricio F.A., recoñeceu que, entre os anos 2009 e 2010, subtraeu uns 200.000 euros das contas do depósito para apostalos "integramente" no casino. Este martes celebrouse na sección segunda da Audiencia de Pontevedra o xuízo con xurado contra este acusado de malversación. "Gasteimno todo no Casino da Toxa", confesou Fabricio.
No seu relato, asegurou que o fixo por culpa da súa ludopatía, que lle era "totalmente imposible controlar o impulso", xa que "ía ao traballo pensando sempre en xogar".
Para el, "era unha necesidade" que lle levou a dilapidar en primeiro lugar todo o seu patrimonio persoal e despois o diñeiro da súa familia. "Aquilo custoume o divorcio", afirmou.
SOSTÉN QUE NON SON 500.000 EUROS
"Estou disposto a pagar polo que fixen, pero non polo que non", dixo o acusado, que nega que se apropiou indebidamente do diñeiro restante que lle imputa a Fiscalía, ata chegar aos 505.000 euros. Limita a súa responsabilidade ás contas que a confraría tiña na Caixa e en Banesto.
"Non estou a ocultar o que me levei", engadiu o excontable, quen rexeita desviar diñeiro ás súas contas persoais das caixas que o depósito tiña na lonxa ou na pescadería. "Non cabería esa posibilidade, porque tiña que deixar un recibín, e esa certificación apuntábase no libro diario", agregou.
Ademais, o acusado apuntou que foi el quen advertiu de que as contas da pescadería non cadraban e que era conveniente chamar ao auditor.
AUTODENUNCIA
O excontable da confraría do Grove tamén explicou que cando pediu axuda á Asociación Galega de Xogadores Anónimos (Agaja), entre outras cousas, aconselláronlle que afrontase a súa situación. "Por iso decidín autodenunciarme, porque tiña que porlle freo ao meu problema", explica.
Deste xeito, en novembro de 2010 Fabricio acudiu ao xulgado de Cambados. "Conteille á xuíza o que fixera", narra. "Arruineime a vida. Agora só teño débedas", declarou o acusado.
A Fiscalía solicita seis anos de prisión e 15 anos de inhabilitación para este excontable da confraría de Pescadores do Grove por un delito de malversación de caudais públicos.
