Por Europa Press / Redacción | SANTIAGO DE COMPOSTELA | 27/11/2019 | Actualizada ás 15:06
O tempo medio que tarda unha administración dependente da Xunta en responder a un cidadán é de catro meses. Así o indicou este mércores a directora xeral de Avaliación e Reforma Administrativa, Natalia Prieto, en sede parlamentaria, onde resaltou que a normativa establece un prazo medio de nove meses e que Galicia conseguiu reducir un 26,55% os tempos de resposta.
Prieto remarcou que a Xunta traballa nos últimos anos para "configurar unha administración máis próxima, accesible, transparente, áxil e eficiente" a través da aposta pola vía electrónica como forma de "reducir as cargas burocráticas" para os cidadáns.
En canto ás advertencias sinaladas polo Valedor do Pobo no seu informe polas trabas denunciadas polos galegos nas súas relacións coa administración, o Goberno galego indicou que a Oficina de Defensa das Persoas Usuarias dos Servizos Públicos "leva xa tramitadas máis de 3.000 queixas e sugestiones" que permiten detectar as "áreas susceptibles" de mellora.
Así as cousas, o 94,5% dos procedementos administrativos dependentes da Xunta poden realizarse por vía electrónica, a través da cal tamén se reduciu o número de documentos que os cidadáns teñen que presentar fisicamente, xa que os funcionarios contan cunha plataforma na que poden consultar o DNI, o título de familia numerosa ou o certificado de discapacidade.
PERSPECTIVA DE XÉNERO
Por outra banda, o Grupo Socialista na Cámara galega reclamou ao Goberno autonómico maior compromiso coa inclusión da perspectiva de xénero na planificación urbanística dos espazos urbanos de face a "repensalos" desde a actual concepción orientada a "á produtividade" cara a uns lugares pensados para "o benestar e a seguridade" dos residentes.
Así o indicou a deputada do PSdeG María Pierres durante a formulación dunha pregunta dirixida á directora xeral de Territorio e Urbanismo, Encarnación Rivas, á que cuestionou, no marco da Comisión 1ª do Parlamento, sobre o prazo previsto para a redacción dunha guía para a inclusión desta perspectiva.
Na súa resposta, a responsable da Xunta indicou que esta cuestión "esixe reflexión" para lograr que os espazos urbanos sexan concibidos "de forma integral" e aumentar a seguridade, especialmente para os colectivos "máis desprotexidos". "Cremos no urbanismo que desde a base contribúe a crear unha sociedade mellor a través da organización das dimensións espazo-temporais da cidade para que sexan máis humanas e non haxa brechas nin se consoliden estereotipos de xénero", remarcou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.