Por E.P. | SANTIAGO DE COMPOSTELA | 02/12/2019 | Actualizada ás 10:25
Urxencias Sanitarias de Galicia atendeu a 79 persoas debido a 58 accidentes de tráfico rexistrados nas estradas galegas durante o fin de semana. O sábado e o domingo foron as xornadas que contabilizaron máis incidentes, con 19 sinistros en cada caso.
Segundo informou o 061, a Central de Coordinación recibiu entre as 15,00 horas do venres 29 de novembro e as 23,59 horas do domingo, 1 de decembro, un total de 70 chamadas en relación con accidentes de tráfico.
Os recursos sanitarios mobilizados polo 061 ascenderon a 69. En concreto, as ambulancias realizaron 66 saídas e os equipos sanitarios de Atención Primaria prestaron asistencia en tres accidentes. En 57 casos os feridos foron trasladados aos centros sanitarios correspondentes e en 22 ocasións recibiron atención no lugar do accidente.
A proporción de homes atendida situouse no 66 por cento e a de mulleres reduciuse ao 34%. En canto ás idades dos feridos, o 37% dos asistidos tiña entre os 25 e os 39 anos.
As provincias da Coruña e Pontevedra, con 25 accidentes en cada caso, foron as que rexistraron máis incidentes durante os desprazamentos do fin de semana; seguidas de Ourense, con cinco; e Lugo, con tres.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.